Greinasafn

Lykilþáttur í því að við höfum haft betri tök á efnahagsmálum okkar síðustu tvo áratugi er stjórnkerfi fiskveiðanna. Kvótakerfið eins og það er kallað í daglegu tali hefur gert okkur kleift að stýra sókn með skynsömum hætti í helstu fiskstofna bæði í hagfræðilegu og líffræðilegu tilliti. Vegna þessa hafa fyrirtæki í sjávarútvegi getað skipulagt starfsemi sína með betri og markvissari hætti en áður þekktist. Þessar aðstæður hafa styrkt þau og gert þau kröftugri í alþjóðlegri samkeppni.  Ávextina af þessari uppbyggingarstarfsemi má sjá á öllum sviðum þjóðlífsins. Íslenskur sjávarútvegur er rekinn með arðsemissjónarmið að leiðarljósi  og hann greiðir til samfélagsins öndvert við sjávarútveg í öðrum löndum, sem fær háar styrkjagreiðslur með ýmsum hætti frá samfélaginu.

Mesta gæfa íslensks sjávarútvegs og þar með íslensks efnahagslífs er að stjórnendur sjávarútvegsfyrirtækjanna standa og falla með ákvörðunum sínum. Rangar eða óábyrgar ákvarðanir verða ekki teknar í trausti þess að pólitísk fyrirgreiðsla komi til bjargar.