Auðlindagjald: Rúmar 67 þúsund krónur á

Auðlindagjald:

Rúmar 67 þúsund krónur á

hvert mannsbarn í Grindavík 

 

Samkvæmt samantekt sem LÍÚ hefur unnið, þar sem reynt er að varpa ljósi á þá fjárhæð sem sjávarútvegsfyrirtækin munu greiða í auðlindagjald, er ljóst að gjaldið er fyrst og fremst landsbyggðaskattur.

Í töflu sem birt er hér á heimasíðunni eru tekin dæmi um fjárhæð gjaldsins, en samkvæmt þeim lögum sem samþykkt voru á Alþingi vorið 2002 mun heildargreiðslan verða rúmir 2 milljarðar króna þegar lögin eru að fullu komin til framkvæmda. Það jafngildir því að skattur á hvert þíg kg. yrði um 4,81 kr.

Ef skoðuð er sú fjárhæð sem sjávarútvegsfyrirtæki í hverju sveitarfélagi munu koma til með að greiða kemur eftirfarandi í ljós.

Fyrirtæki í Grímsey munu greiða tæpar 7,3 milljónir, en það nemur tæplega 77 þúsund krónum á hvern þar. Á Stöðvarfirði verður gjaldtakan tæplega 21 milljón, eða rúmar 80 þúsund krónur á mann, í Grindavík verður fjárhæðin rúmar 157 milljónir, sem jafngildir 67 þúsund krónum á mann. Fyrirtæki í  Ísafjarðarbæ munu greiða tæplega 101 milljón króna, sem jafngildir rúmum 24 þúsund krónum á hvert mannsbarn þar. Fyrirtæki í Vestmannaeyjum munu greiða rúmar 216 milljónir króna sem jafngildir tæpum 49 þúsund krónum á hvern einstakling í Eyjum.

Samkvæmt þessari samantekt munu mestu fjármunirnir til greiðslu auðlindagjalds fara frá Akureyri, eða tæpar 264 milljónir kr., frá Vestmannaeyjum fara rúmar 216 milljónir króna, frá Akranesi tæpar 113 miljónir og frá Fjarðabyggð rúmar 109 milljónir króna, frá Snæfellsbæ fara tæpar 102 milljónir, svo nokkur dæmi séu tekin.

Fyrirtæki í Reykjavík munu greiða rúma 181 milljón króna, en fjárhæð auðlindagjalds á hvern Reykvíking er þó aðeins 1.616 krónur. Í Garðabæ yrði heildargreiðslan 640 þúsund krónur, sem jafngildir 76 krónum á mann og í Kópavogi yrði fjárhæðin tæpar 1,4 milljónir, eða 57 krónur að jafnaði á hvern íbúa.

Óljóst er hvernig tekjum ríkisins af veiðigjaldi verður ráðstafað. Samkvæmt tillögum frá nefnd sem falið var að endurskoða gildandi lög um stjórn fiskveiða og kölluð var Endurskoðunarnefnd verður hluta auðlindagjaldsins veitt til baka til sveitarfélaganna í formi styrkja til að byggja upp atvinnulíf í öðrum atvinnugreinum en sjávarútvegi. Þar gæti orðið um að ræða fjárhæð á milli 300 og 500 milljónir króna sem deilt yrði niður á byggðirnar, en augljóst er að þeir fjármunir sem afhentir verða sveitarfélögunum með þeim hætti eru miklum mun lægri en verða fluttir þaðan í formi auðlindagjalds