Hafrannsóknir og fiskveiðiráðgjöf
Ályktun 62. aðalfundar LÍÚ um hafrannsóknir og fiskveiðiráðgjöf Hafrannsóknastofnunarinnar
Árangursrík fiskveiðistjórnun byggir á vísindalegri ráðgjöf um heildarafla. Þær miklu skekkjur, sem nýlega hafa komið í ljós í mati Hafrannsóknastofnunarinnar á stofnstærð þorsks og í veiðiráðgjöf, eru áfall bæði fyrir stofnunina og sjávarútveginn. Af þessum sökum er mikilvægt að stofnuninni takist á ný að skapa tiltrú á ráðgjöf sína.
Til að efla tiltrú og traust er nauðsynlegt að auka samskipti vísindamanna Hafrannsóknastofnunarinnar við starfandi útvegsmenn og sjómenn þannig að vísindamennirnir geti betur gert sér grein fyrir gangi þeirra fiskveiða sem ráðgjöf þeirra beinist að.
Aðalfundurinn skorar á Hafrannsóknastofnunina að efla þann grundvöll mælinga sem fiskveiðiráðgjöfin byggist á, með það að augnamiði að minnka skekkjur í stofnstærðarmati. Fundurinn telur í þessu sambandi nauðsynlegt að:
1. endurskoða skipulag og framkvæmd togararallsins;
2. efla haustrallið til jafns við togararallið;
3. koma markvissu skipulagi á netarallið;
4. efla mælingar á grunnslóð; og
5. nýta þær upplýsingar sem safnast í vinnslunni um stærðarsamsetningu aflans.
Þá er ennfremur nauðsynlegt að þær miklu upplýsingar sem afladagbækur hafa að geyma verði nýttar með markvissum hætti og túlkaðar með hliðsjón af markmiðum með veiðum einstakra skipa.
Einstakar fisktegundir
Ufsi
Aðalfundurinn telur, að við þær aðstæður sem eru í ufsaveiðunum sé ekki gagn að fiskveiðiráðgjöf sem byggir á gögnum um afla á sóknareiningu, enda geti slík gögn ekki endurspeglað vaxandi stofnstærð þegar takmarkaðar aflaheimildir koma að mestu í veg fyrir beina sókn í ufsann. Fundurinn skorar á Hafrannsóknastofnunina að taka upp markvissar mælingar á nýliðun og stofnstærð ufsa.
Ýsa
Aðalfundurinn telur mikilvægt að aðgerðir til verndar smáýsu verði markvissari en verið hefur. Göngur ýsunnar eru með þeim hætti að smáýsa getur birtst snögglega og einnig farið fljótt aftur af bleiðunum. Því er mikilvægt að fylgst sé vel með stærðarsamsetningu ýsuafla og veiðisvæðum lokað þegar vart verður við mikla smáýsu. Þá er ekki síður mikilvægt að kanna lokuð svæði með skipulegum hætti svo að unnt sé að opna aftur um leið og magn smáýsu hefur minnkað.
Skarkoli og sandkoli
Aðalfundurinn bendir á, að aflabrögð hafa batnað verulega í skarkola- og sandkolaveiðum að undanförnu. Að mati fundarins byggir fyrirliggjandi ráðgjöf á ófullnægjandi upplýsingum og úthlutaðar aflaheimildir duga ekki fyrir óumflýjanlegum meðafla við aðrar veiðar. Af þessum sökum telur fundurinn nauðsynlegt að sjávarútvegsráðherra auki við veiðiheimildirnar án tafar.
Veiðarfæri
Aðalfundurinn leggur áherslu á mikilvægi þess að veiðarfærarannsóknir Hafrannsóknastofnunar verði efldar að nýju. Veiðarfæri og veiðarfæranotkun hafa tekið mikilli þróun undanfarin ár. Stofnunin verður að ráða yfir sérþekkingu á veiðarfærum til þess að geta túlkað upplýsingar um afla á sóknareiningu í mismunandi veiðarfæri og til að geta ráðlagt um æskilega þróun veiðarfæra til að auka kjörhæfni þeirra og minnka hættu á ánetjun. Mörg verkefni bíða úrlausnar á þessu sviði, m.a. vegna mikillar þróunar í smáfiskaskiljum, vegna breyttra aðferða við veiðar á uppsjávarfiski í flottroll og hringnót, vegna stækkunar möskva í þorskanetum o.s.frv. Nauðsynlegt er að stofnunin sé í stakk búin til að sinna þessum verkefnum.
Ufsa- og ýsukvóti
Aðalfundurinn skorar á sjávarútvegsráðherra að endurskoða kvótaúthlutun á ufsa og ýsu með aukningu í huga. Það hefur sýnt sig að undanfarin tvö haust hefur verið mikil ufsa- og ýsugengd við suðurströndina.
