Ályktanir aðalfunda

Meðfylgjandi eru ályktanir aðalfunda LÍÚ 2002- 2008

Ályktanir aðalfundar LÍÚ 2008

Hvalveiðar

Aðalfundur LÍÚ, haldinn í Reykjavík 30.-31. október 2008, leggur áherslu á að veiðum á hrefnu og langreyði í atvinnuskyni verði haldið áfram.

Stofnstærð hrefnu og langreyðar er nú talin nálægt upprunalegri stærð og sjálfbærar veiðar í samræmi við tillögur Hafrannsóknastofnunarinnar munu ekki ganga um of á þessa stofna að mati vísindanefndar Alþjóða hvalveiðiráðsins. Ráðið sjálft hefur ennfremur úrskurðað að hvalveiðar Íslendinga séu fyllilega löglegar.

Makrílrannsóknir

Aðalfundur LÍÚ, haldinn í Reykjavík 30.-31. október 2008 hvetur til þess að makrílrannsóknir verði efldar til muna.

Makrílveiðar

Aðalfundur LÍÚ, haldinn í Reykjavík 30.-31. október 2008, beinir því til stjórnvalda að tryggja réttindi Íslendinga til að stunda makrílveiðar.

Greiðslumiðlun og tryggingasjóður

Aðalfundur LÍÚ, haldinn í Reykjavík 30.-31. október 2008, beinir því enn á ný til stjórnvalda að greiðslumiðlunarsjóður og tryggingasjóður verði felldir niður.

Afnám mismununar

Aðalfundur LÍÚ, haldinn í Reykjavík 30.-31. október 2008, beinir því til sjávarútvegsráðherra að tilflutningur aflaheimilda á milli útgerðaflokka verði stöðvaður. Þannig verði línuívilnun og byggðakvóti felld niður og slægingarstuðull leiðréttur.

Tillaga um ráðstöfun styrkja úr verkefnasjóði sjávarútvegsins

Aðalfundur LÍÚ, haldinn í Reykjavík 30.-31. október 2008, samþykkir að beina því til sjávarútvegsráðherra að aukinn hluti ráðstöfunarfjár verkefnasjóðs sjávarútvegsins fari til viðurkenndra rannsóknarstofa á landsbyggðinni.

Tillaga að breytingu á 20. grein samþykkta LÍÚ

Aftan við fyrstu málsgrein 20. greinar samþykkta LÍÚ bætist eftirfarandi:  Varaformaður gegnir störfum formanns í forföllum hans og sama gildir láti hann af störfum. 

 Ályktanir aðalfundar LÍÚ 2007

Aðalfundurinn felur stjórn samtakanna að efna til viðræðan við sjávarútvegsráðuneytið og Hafrannsóknastofnunina um endurskoðun þeirra reglna sem gilda um þriggja og fjögurra mílna línur.

Aðalfundurinn beinir því til sjávarútvegsráðherra að skoðað verði með opnun á hólfum sem nú eru lokuð, til að auðvelda skipum veiðar á ýsu, karfa og ufsa. Eins og reynsla síðastliðins árs sýnir þá er illmögulegt að ná aflamarki í t.d.  ýsu vegna þess hve aflamark þorsks er lítið.

Aðalfundurinn beinir því til Sjávarútvegsráðherra að endalaus tilflutningur aflaheimilda á milli útgerðaflokka verði stöðvaður. Þannig verði línuívilnun og byggðakvóti felld niður og slægingarstuðull leiðréttur.

Aðalfundurinn telur að til mótvægis við skerðingu þorskaflamarks þurfi að grípa til eftirtalinna aðgerða:

*    fella strax niður veiðigjald af öllum tegundum;

*     auka fjárveitingar til hafrannsókna;

*     efla veiðarfærarannsóknir;

*     efla fiskeldisrannsóknir.

Aðalfundurinn fagnar því hversu mjög  Þyrlubjörgunarsveit Landhelgisgæslu Íslands hefur vaxið fiskur um hrygg og hversu öflug sveitin er orðin. Fundurinn beinir því til ríkisstjórnarinnar að staðsetja þyrlu úti á landi sem mun þannig staðsett auka ennfrekar á öryggi og margfalda þjónustugetu sveitarinnar.

Aðalfundurinn leggur áherslu á að hvalveiðum í atvinnuskyni verði haldið áfram.

Aðalfundurinn ítrekar samþykkt aðalfundar ársins 2005 um að  lög um greiðslumiðlun verði afnumin.

Aðalfundurinn ítrekar samþykkt aðalfundar frá árinu 2005 um að beina  því til sjávarútvegsráðherra og Hafrannsóknastofnunarinnar að loðnurannsóknir verði auknar til mikilla muna. Rannsóknir beinist meðal annars að eftirfarandi:

• að leggja mat á reynslu af núgildandi reglu við stjórn loðnuveiða, sem gerir ráð fyrir að 400 þúsund tonn séu skilin eftir til hrygningar;
• að kanna magn og útbreiðslu ungloðnu og göngur hrygningarloðnu með hliðsjón af útbreiðslu þorsks;
• að rannsaka vistfræði loðnu í ætisgöngum norður í haf að sumarlagi;
• að kanna umfang möskvasmugs við veiðar í flotvörpu;
• að kanna hvort veiðar í flotvörpu hafi áhrif á göngur loðnunnar og þá hvernig og í hvaða mæli.

Jafnframt verði áhrif flotvörpu við síldveiðar rannsökuð.

Aðalfundurinn beinir því til stjórnvalda að misræmi og mismunum á milli útgerðarflokka verði eytt.   Samræmdar verði kröfur um öryggi og réttindi áhafna hvort sem er í útgerð smábáta eða útgerð stærri skipa.  Sömu kröfur á að gera til allra útgerða í landinu hvað kjara- og fiskverðssamninga varðar,- útgerðir smábáta eiga ekki að vera þar undanskildar.  Einnig á að gilda jafnræði hvað varðar framsal aflaheimilda.

Aðalfundurinn leggur áherslu á að Verðlagsstofa skiptaverðs fylgi eftir að farið sé eftir fyrirliggjandi samningum um fiskverð.

Ályktanir aðalfundar LÍÚ 2006

Hvalveiðar

Aðalfundur LÍÚ haldinn 19.-20. október 2006 fagnar ákvörðun sjávarútvegsráðherra um að heimila hvalveiðar í atvinnuskyni.

Samþykkt samhljóða.

Starfsskilyrði sjávarútvegsins

Aðalfundur LÍÚ haldinn 19.-20. október 2006 skorar á sjávarútvegsráðherra  að beita sér fyrir því að minnka álögur, einfalda og samhæfa eftirlit og þjónustu sem ríkið hefur með höndum í þeim tilgangi að auka skilvirkni og lækka kostnað.

Samþykkt samhljóða.

Ójafnræði

Aðalfundur LÍÚ haldinn 19.-20. október 2006 skorar á sjávarútvegsráðherra  að uppræta það ójafnræði sem er innan sjávarútvegsins. Er hér meðal annars átt við línuívilnum, útflutningsálag, ranga slægingastuðla, mismunun í möguleikum aðila í aflamarks- og krókaaflamarkskerfunum til að kaupa aflamark og aflahlutdeild og óréttlæti við úthlutun byggðakvóta.  Það er grundvallaratriði að í sjávarútvegi gildi almennar leikreglur þar sem virðing er borin fyrir jafnræði eins og á öðrum sviðum þjóðlífsins.

Samþykkt samhljóða.

Efnahagsályktun 67. aðalfundur LÍÚ.

Aðstæður í íslensku efnahagslífi eru óvissar. Mikil framkvæmdagleði ríkir í þjóðfélaginu með tilheyrandi þenslu. Mikilvægt er að gæta aðhalds og  taka ábyrgar ákvarðanir í efnahagsmálum við slíkar aðstæður.

Hátt gengi krónunnar samhliða mikilli innlendri verðbólgu hefur skaðað starfsemi fyrirtækjanna og leitt til óviðunandi reksturs þeirra. Eigið fé fyrirtækja minnkar og þau eru verr í stakk búin að mæta versnandi aðstæðum. t.d. á erlendum mörkuðum.

Seðlabankanum hefur aldrei tekist að halda innlendri verðbólgu innan verðbólgumarkmiða sem eru 2,5%. Því hljóta þessi verðbólgumarkmið að teljast óraunhæf við þær aðstæður sem ríkt hafa. Vaxtahækkanir Seðlabankans hafa reynst vanhugsaðar og leitt til mikillar útgáfu erlendra skuldabréfa í íslenskum krónum. Þessi staða hefur leitt til óeðlilegrar styrkingar krónunnar og valdið sjávarútveginum gríðarlegum tekjumissi.

Mikilvægt er að Seðlabankinn hefji strax lækkun vaxta og stjórnvöld leiti allra leiða til þess að draga úr þeirri þenslu sem er í efnahagslífinu í samvinnu við aðila vinnumarkaðarins.

Eðlilegt er að spurt sé hvort Seðlabankinn sé kominn í þá stöðu að geta ekki lækkað vexti af ótta við að erlendir aðilar innleysi bréf sín með alvarlegum afleiðingum fyrir íslenskt efnahagslíf.

Samþykkt samhljóða.

Samstarf atvinnurekenda í sjávarútvegi

Aðalfundur LÍÚ haldinn 19.-20. október 2006 samþykkir að samtökin beiti sér fyrir stofnun formlegs samstarfsvettvangs samtaka atvinnurekenda í sjávarútvegi sem starfa innan Samtaka atvinnulífsins.

Meginhlutverk samstarfsins felist í nánara samstarfi og samþættingu verkefna er varða kynningu og ímyndarmál sjávarútvegsins, auk umhverfismála og annarra verkefna er varða sameiginlega hagsmuni sjávarútvegsins.

Samþykkt samhljóða.

Ályktanir aðalfundar LÍÚ 2004

Afnám línuívilnunar

Aðalfundur LÍÚ haldinn í Reykjavík 28.-29. október 2004 skorar á sjávarútvegsráðherra að beita sér fyrir því að svonefnd línuívilnun verði afnumin.  Línuívilnun felur í sér grófa mismunun þar sem einum útgerðarflokki eru veittar auknar veiðiheimildir á kostnað annarra.  Ívilnun til línubáta hefur leitt til þess að veiðiheimildir annarra hafa verið skertar um meira en 5000 tonn í þorski, ýsu og steinbít. Mismunun af þessu tagi samrýmist ekki hugmyndum um jafnræði og því að almennar reglur gildi um starfsemi þegnanna.

Samþykkt samhljóða

Loðnurannsóknir

Aðalfundur LÍÚ haldinn í Reykjavík 28.-29. október 2004 hvetur til aukinna loðnurannsókna.  Til dæmis mætti útbúa loðnuskip af minni gerð til loðnuleitar. Skipið kanni útbreiðslu stofnsins og afli gagna til úrvinnslu hjá Hafrannsóknastofnuninni og fylli í þau göt sem eru á þekkingu um hegðan og göngu loðnunnar. Skipið verði búið mælibúnaði sem Hafrannsóknastofnunin leggur til, þannig að gögn sem safnað verður nýtist til útreikninga á stærð stofnsins og útbreiðslu hans. Lögð er áhersla á að loðnurannsóknir eru mjög mikilvægar vegna alls lífríkisins í hafinu.

Samþykkt samhljóða

Niðurfelling veiðigjalds

Aðalfundur LÍÚ haldinn í Reykjavík 28.-29. október 2004 skorar á sjávarútvegsráðherra að beita sér fyrir því að veiðigjald sem lagt var á með lögum númer 85/2002 verði fellt úr gildi. Hér er um verulega mismunun að ræða þar sem fyrirtæki í öðrum atvinnugreinum sem nýta náttúruauðlindir eru ekki skattlögð með sama hætti. Einnig er hér um skattlagningu að ræða sem kemur harðast niður á landsbyggðinni.

Samþykkt samhljóða

Framsal aflaheimilda

Aðalfundur LÍÚ haldinn í Reykjavík 28.-29. október 2004 skorar á sjávarútvegsráðherra að beita sér fyrir því að lögum um stjórn fiskveiði verði breytt á þann veg að heimild til framsals aflamarks og aflahlutdeildar frá skipum í aflamarkskerfi til skipa í krókaaflamarkskerfi verði afnumin.

Samþykkt með öllum greiddum atkvæðum nema einu

Meðafli við kolmunnaveiðar

Aðalfundur LÍÚ samþykkir að setja á fót 5 manna nefnd sem leggi til útfærslu á hvernig meðafli á kolmunnaveiðum verði talinn til aflamarks.  Nefndin ljúki störfum fyrir áramót.

Samþykkt með yfirgnæfandi meirihluta atkvæða

Eftirlitsiðnaður

Aðalfundur LÍÚ haldinn í Reykjavík 28. 29. október 2004 skorar á sjávarútvegsráðherra að láta fara fram gagngera úttekt á kostnaði við ört vaxandi eftirlitsiðnað, svo sem Fiskistofu og fleiri stofnanir og hversu íþyngjandi slík starfsemi er fyrir sjávarútveginn. Því er beint til ráðherra að hann beiti sér fyrir einföldun á þessum málum þannig að starfsemi þessara stofnana verði gegnsærri.

Samþykkt samhljóða

Hvalveiðar

Aðalfundur LÍÚ haldinn í Reykjavík 28.- 29. október 2004 skorar á sjávarútvegsráðherra að standa við áður gerðar áætlanir um vísindaveiðar á hval.  Jafnframt skorar fundurinn á sjávarútvegsráðherra að halda áfram undirbúningi þannig að atvinnuveiðar á hval hefjist strax vorið 2006.

Samþykkt með öllum greiddum atkvæðum nema einu

Eftrirfarandi ályktanir voru samþykktar á aðalfundi LÍÚ árið 2003.

Línuívilnun

Aðalfundur LÍÚ haldinn í Reykjavík 30.-31. október 2003 mótmælir harðlega áformum stjórnvalda um að tekin verði upp sérstök ívílnun í kvóta til báta sem róa með línu. Slík ívilnun mun óhjákvæmilega leiða til mismununar fyrirtækja innan atvinnugreinarinnar, þar sem einum útgerðarflokki yrði veittar auknar veiðiheimildir á kostnað annarra.  Heildarafli á Íslandsmiðum er takmarkaður og því er ljóst að ef til slíkrar mismununar kemur mun það leiða til þess að veiðiheimildir annarra verða skertar að sama skapi.

Ef línubátum verður leyft að veiða meira en núverandi aflamark þeirra kveður á um mun það ekki aðeins koma niður á fyrirtækjunum sem fyrir skerðingunni verða og starfsfólki þeirra til sjós og lands, heldur einnig á þeim byggðarlögum þar sem útgerð byggist ekki á línuveiðum.

Frá því aflamarkskerfi var tekið upp á Íslandi hafa smábátar aukið afla sinn gríðarlega á kostnað aflamarksskipanna.  Ljóst er að markmið útgerða smábáta  með svonefndri línuívilnun er að ná til sín enn stærri hluta af veiðiheimildum þeirra.  Við það verður ekki unað.

Samþykkt samhljóða

Hvalveiðar

Aðalfundur LÍÚ haldinn í Reykjavík 30.-31. október 2003 hvetur stjórnvöld til að hefja hvalveiðar í atvinnuskyni svo fljótt sem verða má og ekki síðar en vorið 2006, í samræmi við fyrirvara Íslands við núllkvóta við inngöngu í Alþjóða hvalveiðiráðið.

Aðalfundurinn fagnar því að vísindaveiðar á hrefnu voru hafnar sl. haust og hvetur stjórnvöld til að hvika hvergi frá þeirri áætlun um vísindaveiðar sem kynnt hefur verið og miðar að árlegum veiðum á 100 langreyðum,  50 sandreyðum og 100 hrefnum á tveggja ára tímabili.

Það er skylda Íslendinga að nýta sér auðlindir sínar á hagkvæman hátt og stunda sjálfbærar veiðar og eru hvalveiðar þar ekki undanskildar.

Samþykkt samhljóða

Loðnuráðgjöf

Aðalfundur LÍÚ haldinn í Reykjavík 30.-31. október 2003 beinir því til Hafrannsóknarstofnunar að við gerð tillagna um kvóta í loðnu og veiðar úr loðnustofninum sé tryggt að hæfilegt magn af loðnu verði eftir sem fæða er þorskur gengur á hrygningarslóð.

Samþykkt samhljóða

Skipting aflaheimilda í karfa

Aðalfundur LÍÚ haldinn í Reykjavík 30.-31. október 2003 samþykkir að skipa 5 manna starfshóp samkvæmt tillögu allsherjarnefndar til að gera tillögur til stjórnar LÍÚ um skiptingu aflaheimilda í karfa.  Í starfshópnum eiga sæti Adolf Guðmundsson, Guðrún Lárusdóttir, Ólafur Marteinsson, Rúnar Þór Stefánsson og Stefán Friðriksson. Friðrik Arngrímsson kallar starfshópinn saman og starfar með honum auk Kristjáns Þórarinssonar.

Nú hafa rannsóknir leitt í ljós að djúpkarfi sem veiddur hefur verið sem úthafskarfi utan úthafskarfalínu undanfarin ár er sami stofn og sá djúpkarfi sem veiddur hefur verið í djúpköntunum innan lögsögu. Þá liggja fyrir upplýsingar um að fleiri en einn djúpkarfastofn er við Ísland og vísbendingar um að fleiri en einn gullkarfastofn sé við landið. Ljóst er að þetta skiptir miklu varðandi framtíðarrétt Íslendinga til veiða úr karfastofnum. Jafnframt blasir við að skoða þarf gaumgæfilega forsendur fyrir skiptingu aflaheimilda í þessu ljósi, bæði milli Íslands og annarra þjóða og innanlands. Hér er um margþætt mál að ræða og nauðsynlegt er að afla ítarlegra gagna um alla þætti þess þannig að unnt verði að leiða það farsællega til lykta með hagsmuni allra í huga. Starfshópnum er falið að haga störfum sínum með hliðsjón af framangreindu.  Í ljósi mikilvægis málsins er starfshópnum falið að skila áliti sínu til stjórnar samtakanna eins fljótt og verða má.

Samþykkt samhljóða

Stjórn á djúpkarfaveiðum

Aðalfundur LÍÚ haldinn í Reykjavík 30.-31. október 2003 samþykkir að skora á sjávarútvegsráðherra að beita sér fyrir því að Ísland og Grænland taki sem strandríki stjórn á veiðum á þeim hluta djúpkarfastofnsins sem hingað til hefur verið stjórnað á vettvangi NEAFC. Jafnframt skorar fundurinn á sjávarútvegsráðherra að skipa starfshóp með aðkomu útvegsmanna til að gera tillögur um skiptingu aflaheimilda í karfa í ljósi nýrra upplýsinga.

Nú hafa rannsóknir leitt í ljós að djúpkarfi sem veiddur hefur verið sem úthafskarfi utan úthafskarfalínu undanfarin ár er sami stofn og sá djúpkarfi sem veiddur hefur verið í djúpköntunum innan lögsögu. Þá liggja fyrir upplýsingar um að fleiri en einn djúpkarfastofn er við Ísland og vísbendingar um að fleiri en einn gullkarfastofn sé við landið. Ljóst er að þetta skiptir miklu varðandi framtíðarrétt Íslendinga til veiða úr karfastofnum. Jafnframt blasir við að skoða þarf gaumgæfilega forsendur fyrir skiptingu aflaheimilda í þessu ljósi, bæði milli Íslands og annarra þjóða og innanlands. Hér er um margþætt mál að ræða og nauðsynlegt er að afla ítarlegra gagna um alla þætti þess þannig að unnt verði að leiða það farsællega til lykta með hagsmuni allra útvegsmanna sem málið varðar í huga. Mikilvægt að starfshópurinn hagi störfum sínum með hliðsjón af framangreindu.

Samþykkt samhljóða
Ályktanir aðalfundar LÍÚ 2002

Útflutningsálag

Aðalfundur LÍÚ 2002 skorar á sjávarútvegsráðherra að fella niður álag á óunninn útfluttan fisk. 

Smáfiskaskiljur

Aðalfundur LÍÚ 2002 felur stjórn samtakanna að óska eftir við stjórnvöld að samstarf verði haft við hagsmunaaðila við rannsóknir og löggildingu á smáfiskaskiljum. 

 Ufsakvóti

Aðalfundur LÍÚ 2002 skorar á sjávarútvegsráðherra að endurskoða kvótaúthlutun á ufsa með aukningu í huga.  Það hefur sýnt sig að undanfarin þrjú haust hefur verið mikil og vaxandi ufsagengd við suðurströndin og hafa skip þurft að flýja undan mikilli ufsaveiði. 

Kvóti skarkola og sandkola

Aðalfundur LÍÚ 2002 skorar á sjávarútvegsráðherra að auka við kvóta skarkola og sandkola um 2 þúsund lestir af hvorri tegund.  Á síðasta ári og í ár hafa viðbrögð kolastofna við minni sókn komið í ljós og aflabrögð batnað verulega.

Þorskur

Aðalfundur LÍÚ 2002 skorar á sjávarútvegsráðherra að auka nú þegar aflamark í þorski um 11 þúsund lestir.  Smábátum í sóknarmarki sem eiga rétt á að veiða um 1800 lestir af þorski verði jafnframt gert að halda þorskafla sínum innan settra marka. 

Aflabætur vegna aflabrests

Aðalfundur LÍÚ 2002 skorar á stjórnvöld að setja skýrar og gagnsæjar reglur um þær aflabætur sem þau ákvarða að úthluta eða taka af útgerðum vegna aflabrests.  Jafnframt að tryggja að allar fisktegundir séu með í þeim bótum. 

Endurvigtun eftir slægingu

Aðalfundar LÍÚ 2002 skorar á sjávarútvegsráðherra að heimila endurvigtun eftir slægingu þegar fiski er landað óslægðum. 

 Auðlindaskattur

Aðalfundur LÍÚ 2002 beinir því til stjórnar að samtökin beiti sér fyrir því að sá sértæki auðlindaskattur sem áformað er að setja eingöngu á fiskveiðar verði felldur niður. 

 Sértækar úthlutanir aflamarks

Aðalfundur  LÍÚ 2002 mótmælir öllum sértækum úthlutunum aflamarks úr sameiginlegri aflahlutdeild, svo sem til smábáta, byggðakvóta og til áframeldis. 

 
Hvalveiðar

Aðalfundur LÍÚ 2002 lýsir enn og aftur furðu sinni á hægagangi stjórnvalda við að framfylgja samþykkt Alþingis um hvalveiðar frá 10. mars 1999.
Aðalfundurinn vekur athygli á samþykkt aðalfundar LÍÚ 2001 en þar lýsti fundurinn því að hann styddi ákvörðun stjórnvalda að gerast aðildarríki Alþjóðahvalveiðiráðsins með fyrirvara um núllkvóta samþykkt þess.
Frá því aðalfundur LÍÚ var haldinn árið 2001 hafa íslensk stjórnvöld afhent tvö ný aðildarskjöl að Alþjóðahvalveiðiráðinu. Í báðum þessum kjölum hefur verulega verið dregið úr vægi fyrirvarans um núllkvóta samþykkt  ráðsins.Vegna þessa er vandséð hvenær hvalveiðar í atvinnuskyni hefjast að nýju.
Fundurinn mótmætir þessum vinnubrögðum og skorar á íslensk stjórnvöld að láta nú þegar af þessari undanlátssemi.