Samþykktir Landssambands íslenskra útvegsmanna
Samþykktir
Landssambands íslenskra útvegsmanna
I. KAFLI
Nafn, heimili og tilgangur
1. grein
Félagið heitir Landssamband íslenskra útvegsmanna, skammstafað LÍÚ. Heimili þess og varnarþing er í Reykjavík.
2. grein
Tilgangur LÍÚ er:
Að vera heildarsamtök útvegsmanna og málsvari þeirra í almennum hagsmunamálum.
Að stuðla að framförum í sjávarútvegi.
Að stuðla að sjálfbærri og hagkvæmri nýtingu fiskistofna og vinna að umhverfismálum.
Að gæta hagsmuna útvegsmanna við gerð kjarasamninga.
Að taka þátt í alþjóðasamstarfi og gæta hagsmuna útvegsmanna við samningsgerð íslenska ríkisins við önnur ríki.
Að annast samninga við vátryggingafélögin um iðgjöld og fjárhæðir fiskiskipa og semja um kostnað við veitta aðstoð og björgunarlaun.
Að vera í forsvari við rekstur mála fyrir dómi og gagnvart stjórnvöldum er snerta sérstaklega hagsmuni og réttindi félagsmanna.
II. KAFLI
Aðild að sambandinu
3. grein
Aðild að LÍÚ eiga útvegsmenn sem gerast aðilar að útvegsmannafélagi innan LÍÚ. Útvegsmenn hafa frjálst val um hvar þeir eru í félagi, óháð félagssvæðum.
Umsókn útvegsmannafélags að LÍÚ skal send stjórn sambandsins ásamt þeim upplýsingum um félagið og aðildarfyrirtæki þess sem stjórnin ákveður. Inntökubeiðni telst samþykkt ef meirihluti stjórnar er henni samþykkur.
Útvegsmannafélögum er skylt að senda skrifstofu LÍÚ upplýsingar um nýja félagsmenn og skip í þeirra eigu sem og um úrsagnir.
Útvegsmannafélög setja sér sjálf samþykktir, innan þess ramma sem samþykktir þessar heimila, og skal þess gætt að ekkert ákvæði þeirra brjóti í bága við samþykktir LÍÚ.
4. grein
LÍÚ á aðild að Samtökum atvinnulífsins. Aðild að útvegsmannafélagi og LÍÚ felur jafnframt í sér beina aðild að Samtökum atvinnulífsins með þeim réttindum og skyldum sem kveðið er á um í samþykktum SA.
LÍÚ og Samtök atvinnulífsins annast gerð kjarasamninga fyrir félagsmenn og taka ákvarðanir um vinnustöðvanir í samræmi við samþykktir LÍÚ og SA og lög nr. 80/1938 um stéttarfélög og vinnudeilur. Ákvörðun um verkbann skal borin undir alla félagsmenn LÍÚ í sameiginlegri leynilegri atkvæðagreiðslu og skal eitt atkvæði gilda fyrir hvert skip félagsmanna. Ef ákvörðun um verkbann tekur einungis til hluta félagsmanna skal heimilt að aðeins þeir sem málið varðar hafi atkvæðisrétt. Komi til atkvæðagreiðslu um kjarasamning skulu sömu ákvæði gilda og atkvæðagreiðslu um verkbann.
Aðildarfyrirtækjum LÍÚ er óheimilt að taka þátt í kjaraviðræðum eða gera kjarasamninga við stéttarfélög sjómanna nema fyrir liggi samþykki LÍÚ og Samtaka atvinnulífsins.
III. KAFLI
Úrsögn, brottvikning og viðurlög
5. grein
Úrsögn útvegsmannafélags skal vera skrifleg og undirrituð af stjórnendum félagsins. Miðast úrsögn við áramót með minnst 6 mánaða fyrirvara. Þó má hvorki segja sig úr sambandinu eða útvegsmannafélagi né fara úr þeim á meðan vinnudeila sem snertir hlutaðeigandi aðildarfélag eða fyrirtæki stendur yfir.
Stjórn LÍÚ er heimilt að víkja útvegsmannafélagi og/eða aðildarfyrirtæki úr sambandinu vegna vanskila eða annarra brota á samþykktum þessum eða öðrum ákvörðunum sambandsins. Sama á við vinni aðildarfyrirtæki gegn hagsmunum útvegsmanna. Brottvikning aðildarfyrirtækis úr sambandinu er jafnframt brottvikning úr viðkomandi útvegsmannafélagi.
Úrsögn eða brottvikning leysir aðildarfyrirtæki ekki undan greiðslu áfallinna árgjalda. Fyrir brot á samþykktum þessum er stjórn LÍÚ heimilt að leggja févíti á aðildarfyrirtæki að fjárhæð kr. 500.000 til 10.000.000 á skip.
IV. KAFLI
Árgjöld reikningar sambandsins
6. grein
Aðalfundur ákveður árlega árgjald til sambandsins og gildir sú ákvörðun frá upphafi næsta árs. Árgjald skal reiknað sem hundraðshluti af heildarlaunagreiðslum næstliðins árs.
Aðildarfyrirtækjum er skylt að senda skrifstofu LÍÚ upplýsingar um greidd laun og aðrar þær upplýsingar sem sambandið kann að þurfa vegna starfsemi sinnar.
Árgjöld skulu innheimt ársfjórðungslega með gjalddögum 15. febrúar, 15. maí, 15. ágúst og 15. nóvember, en eindaga mánuði eftir gjalddaga. Áætla má árgjald á meðan upplýsingar um heildarlaunagreiðslur liðins árs liggja ekki fyrir.
Þeir sem segja sig úr sambandinu eða aðildarfélögum þeirra greiða árgjald til þeirra áramóta þegar þeir ganga út, en hætti fyrirtæki starfsemi á árinu greiðir það árgjald til loka þess ársfjórðungs er skrifstofu sambandsins er tilkynnt að fyrirtæki sé hætt starfsemi. Þegar um brottvikningu er að ræða skal greiða árgjald til loka þess ársfjórðungs er brottvikning fer fram.
Starfsár sambandsins og reikningsár er almanaksárið.
V. KAFLI
Aðalfundur
7. grein
Aðalfund skal halda fyrir lok nóvembermánaðar ár hvert, eftir nánari ákvörðun sambandsstjórnar.
8. grein
Til aðalfundar skal boða með fjögurra vikna fyrirvara. Til aukafundar skal að jafnaði boða með eigi skemmri en viku fyrirvara. Þó er sambandsstjórn heimilt að boða til fundar með skemmri fyrirvara ef brýna nauðsyn ber til að hennar dómi.
9. grein
Fundarboð skal sent útvegsmannafélögum með tilskildum fyrirvara.
10. grein
Til þess að aðalfundur sé lögmætur, þurfa að vera mættir fulltrúar, sem ráða yfir 3/5 hluta atkvæða. Ef ekki mæta svo margir, að fundur sé lögmætur, skal boða til aðalfundar að nýju með eigi skemmri en fimm daga fyrirvara, og er þá fundur lögmætur án tillits til fundarsóknar.
11. grein
Í fundarboði skal getið helstu mála, sem fyrir eiga að koma á fundinum.
Samþykktum sambandsins má aðeins breyta á aðalfundi, enda sé þess getið í fundarboði, að tillögur til lagabreytinga verði lagðar fram á fundinum. Skulu tillögur um breytingar á samþykktum hafa borist stjórn sambandsins svo tímanlega, að hægt sé að senda þær sambandsfélögunum með fundarboði.
Breytingar á samþykktum taka eigi gildi, nema fulltrúar, sem ráða yfir 3/5 mættra atkvæða, samþykki þær.
12. grein
Á aðalfundi skulu tekin fyrir þessi mál:
1. Formaður sambandsins setur fundinn og stjórnar kosningu fimm manna kjörbréfanefndar, sem athugar þegar kjörbréf fulltrúa og skilar áliti um þau.
2. Formaður stjórnar kosningu fundarstjóra.
3. Fundarstjóri skipar fundarritara.
4. Fundarstjóri gefur yfirlýsingu um lögmæti fundar.
5. Framkvæmdastjóri leggur fram endurskoðaða reikninga sambandsins fyrir liðið reikningsár.
6. Kosning nefnda.
7. Umræður og afgreiðsla mála, þ.á. m. ákvörðun árgjalda.
8. Tillögur um breytingar á samþykktum, sem löglega eru fram bornar.
9. Kosin stjórn.
10. Kosinn löggiltur endurskoðandi til eins árs.
13. grein
Í stjórn LÍÚ skal kjósa 15 menn og 14 til vara. Formaður skal kosinn sérstaklega til eins árs í senn. Aðrir stjórnarmenn skulu kosnir til þriggja ára í senn, þannig að á aðalfundi LÍÚ árið 2002 skulu 5 stjórnarmenn ganga úr, á aðalfundi LÍÚ 2003 skulu 4 stjórnarmenn ganga úr, á aðalfundi LÍÚ 2004 skulu 5 stjórnarmenn ganga úr og á aðalfundi LÍÚ 2005 skulu 5 ganga úr og þannig koll af kolli. Skal þess ávallt gætt að útvegsmannafélag, sem ræður að minnsta kosti 10% af heildaratkvæðum skv. atkvæðaskrá, sé tryggður einn maður í aðalstjórn.
Í varastjórn skal kosið á sama hátt.
VI. KAFLI
Sambandsfundir
14. grein
Stjórnin getur boðað til aukafunda, þegar hún telur ástæðu til. Félagar innan sambandsins, sem ráða yfir að minnsta kosti 1/5 atkvæða, geta krafist fundar í sambandinu, og ber að boða fundinn innan tveggja vikna eftir að krafa berst um það.
Fundir eru lögmætir er mættir eru fulltrúar sem ráða yfir að minnsta kosti ¼ atkvæða.
Lögmætir fundir sambandsins hafa æðsta vald í öllum málefnum þess, innan þeirra takmarka, sem samþykktir setja. Afl atkvæða ræður úrslitum, nema öðruvísi sé ákveðið í samþykktum þessum.
15. grein
Hvert útvegsmannafélag fyrir sig kýs fulltrúa á fundi sambandsins.
16. grein
Skrifstofa sambandsins skal við hver áramót útbúa atkvæðaskrá sem tekur gildi 15. febrúar ár hvert og miðast við greidd árgjöld næstliðins reikningsárs. Svara þá kr. 1.000 í greiddum árgjöldum næstliðins árs til eins atkvæðis en greiðslur eldri árgjaldsskulda reiknast ekki til atkvæða. Á sambandsfundum fer um atkvæðisrétt samkvæmt atkvæðaskránni.
VII. KAFLI
Framkvæmd funda
17. grein
Formaður stjórnar sambandsins setur fundi sambandsins og stjórnar kosningu fundarstjóra. Fundarstjóri skipar fundarritara og rannsakar í fundarbyrjun hvort löglega hafi verið til hans boðað og lýsir því síðan yfir hvort svo sé og jafnframt hvort fulltrúar sem ráða yfir nægilegu atkvæðamagni séu mættir til þess að fundur sé lögmætur.
Atkvæðagreiðsla og önnur meðferð mála fer eftir almennum fundarsköpum, sem fundarstjóri kveður nánar um.
Skrifleg atkvæðagreiðsla skal jafnan fara fram þegar þess er óskað.
18. grein
Í aðalgerðabók sambandsins skal rita skýrslur og allar fundarsamþykktir sambandsins, og skulu fundarstjóri og fundarritari undirrita þær.
VIII. KAFLI
Útvegsmannafélög
19. grein
Útvegsmannafélögin skulu halda aðalfundi eigi síðar en 31. október. Á aðalfundum þeirra skal samtals kjósa eitthundrað og áttatíu fulltrúa til eins árs í senn á sambandsfundi, og tilkynna kjör þeirra til sambandsins, minnst tveimur vikum fyrir aðalfund.
Við kjör fulltrúa á sambandsfundi skal fulltrúafjöldi útvegsmannafélags grundvallast annars vegar á greiddum iðgjöldum til sambandsins en hinsvegar af fjölda skipa í eigu félagsmanna útvegsmannafélags.
Níutíu fulltrúar skulu skiptast milli útvegsmannafélaganna á grundvelli greiðslna félagsmanna þeirra til sambandsins og níutíu fulltrúar skulu skiptast á milli þeirra í hlutfalli við fjölda skipa félagsmanna.
IX. KAFLI
Um stjórn og framkvæmdaráð
20. grein
Stjórnin kýs sér varaformann, ritara og vararitara á fyrsta stjórnarfundi eftir aðalfund, til eins árs í senn. Varaformaður gegnir störfum formanns í forföllum hans og sama gildir láti hann af störfum.
Formaður boðar til stjórnarfunda.
Ef þrír stjórnarmenn óska fundar um ákveðið mál, skal formaður boða fund innan tveggja daga, frá því ósk barst þar um.
Afl atkvæða ræður úrslitum á stjórnarfundum, en verði atkvæði jöfn, ræður atkvæði formanns.
21. grein
Stjórnin ræður öllum málum sambandsins milli funda og getur, innan takmarka þessara samþykkta, skuldbundið sambandið með ályktunum sínum og samningum.
Stjórnin kýs fulltrúa í fulltrúaráð Samtaka atvinnulífsins.
22. grein
Kosið skal framkvæmdaráð til eins árs í senn, og hefur það með höndum afgreiðslu þeirra mála, sem fyrir koma milli stjórnarfunda.
Framkvæmdaráð skal skipað sex stjórnarmönnum. Formaður á sæti í framkvæmdaráði og er sjálfkjörinn formaður þess. Hinir fimm skulu kosnir af stjórn sambandsins á fyrsta stjórnarfundi eftir aðalfund. Kosnir skulu jafn margir varamenn. Verði atkvæði jöfn á fundi framkvæmdaráðs, ræður atkvæði formanns úrslitum.
Framkvæmdaráð kýs sér ritara, en varaformaður sambandsins tekur við störfum formanns í forföllum hans.
Framkvæmdaráð hefur heimild til þess að undirrita skjöl fyrir sambandið.
23. grein
Þeir sambandsfélagar sem taka að sér störf fyrir félagið skulu fá greiðslu fyrir þau eftir reikningi, sem framkvæmdaráð eða stjórn úrskurðar.
Aðalfundur ákveður þóknun stjórnar, en stjórn ákveður laun framkvæmdaráðs.
X. KAFLI
Framkvæmdastjóri og starfsmenn
24. grein
Stjórnin velur framkvæmdastjóra, sem stjórnar skrifstofu sambandsins, ræður starfsfólk og hefur á hendi allar daglegar framkvæmdir sambandsins, innheimtu félagsgjalda, allt reikningshald og undirbúning og afgreiðslu mála, eftir nánari fyrirlagi stjórnar og í samráði við hana.
Framkvæmdaráð ákveður laun framkvæmdastjóra.
XI. KAFLI
Slit sambandsins
25. grein
Nú þykir ráðlegt eða nauðsynlegt að leysa upp sambandið, og fer þá um tillögur þar að lútandi sem um breytingar á samþykktum.
Verði sambandið leyst upp, skal eignum þess skipt á milli þeirra, sem þá eru félagar þess í hlutfalli við tillög þeirra frá þeim tíma, er þeir gerðust félagar.
Ákvæði til bráðabirgða:
Ákvörðun árgjalda samkvæmt 6. grein samþykkta þessara fer fyrst fram á aðalfundi árið 2003.
Samþykktir þessar voru samþykktar á aðalfundi sambandsins 1. nóvember 2002 og taka gildi 1. janúar 2003 sbr. þó ákvæði til bráðabirgða um árgjald sbr. 6. grein samþykktanna.
