Spennandi kostur

 Hrefnukjöt er að jafnaði selt á um 40 veitingastöðum og í stórmörkuðum Kaupáss og Samkaupa auk fleiri verslana. Verslanir Hagkaupa og Bónuss selja hins vegar ekki hvalkjöt. Árið 2006 seldust 39 tonn af hrefnukjöti og árið eftir seldist allt hrefnukjöt, sem til féll við veiðarnar og einnig töluvert af súrsuðu rengi. Mikil aukning í sölu hrefnukjöts undanfarin ár gefur skýr merki um að kjötið eigi enn frekari vaxtarmöguleika á innanlandsmarkaði.

Þetta kemur fram í skýrslu sem fimm nemendur í endurmenntunardeild Háskóla Íslands unnu og skiluðu haustið 2006. Í niðurstöðu skýrslunnar segir svo: ”Af svörum viðmælenda að dæma hefur kjötið fengið mjög góðar viðtökur neytenda bæði á veitingahúsum og þeirra sem keypt hafa kjötið í matvöruverslunum. Kjötið er meyrt, stenst vel verðsamanburð og þykir spennandi.

Helsta ógnunin við markaðssetningu á hrefnukjöti er að neytendur þori ekki að smakka kjötið, minningin um lýsisbragð af hvalkjöti er sterk og kjötið er viðkvæmt í meðhöndlun. Þrátt fyrir ógnanirnar eru tækifærin mun fleiri og bjóða upp á marga möguleika til aukinnar markaðssetningar. Niðurstöður markaðsgreiningarinnar sýna að leggja þarf vinnu í að kynna kjötið fyrir neytendum og byggja upp nýja ímynd kjötsins. Af niðurstöðum þessa verkefnis má því draga þá ályktum að hrefnukjöt sé spennandi valkostur og vænleg markaðsvara á innanlandsmarkað.”

Ennfremur segir svo í skýrslunni: “Af greiningunni sem farið hefur fram hér að framan má sjá að miklir möguleikar eru til markaðssetningar á hrefnukjöti á Íslandi enda hefur lítil markaðssetning átt sér stað til þessa. Varan var áður seld frosin í stórum blokkum eða sneiðum og ekkert lagt upp úr framsetningu vörunnar.

Við markaðssetningu er lagt til að beina kröftunum að markhópi sem samanstendur af fólki á aldrinum 25-50 ára. Þessi hópur er oftast fjölskyldufólk og trúlega stærsti hluti viðskiptavina í matvöruverslunum. Hann er opinn fyrir nýjungum og tilbúinn að prófa eitthvað nýtt. Stór tækifæri við markaðssetningu á hrefnukjöti liggja á grillmarkaðnum þar sem þessi markhópur er fyrirferðarmikill.

Lagt er til að áhersla verði lögð á markaðssetningu og vöruþróun fyrir almennan markað til dæmis að selja hrefnukjöt í neytendaumbúðum í matvöruverslunum. Með neytendaumbúðum er meðal annars átt við að selja hrefnukjötið tilbúið beint á grillið. Grillmarkaðurinn er mjög vaxandi markaður og með því að markaðssetja hrefnukjötið með þessum hætti má selja meira magn og auka framlegðina til mikilla muna.

Á síðustu árum hefur orðið ákveðin alþjóðavæðing tengd matargerð og venjum Íslendinga til að mynda hafi réttir á borð við sushi, tapas og carpaccio orðið vinsælli. Fram kom í svörum viðmælenda í fyrrnefndri könnun að hrefnukjöt henti vel í þessa rétti sem gefur tilefni til að ætla að þar liggi ónýtt tækifæri.

Eitt af því sem ber að nýta sér við markaðssetningu á hrefnukjöti er góð næringarefnasamsetning kjötsins. Kjötið er mun próteinríkara og fitusnauðara heldur en annað kjöt og ætti því að höfða til neytenda sem huga að heilsunni,” segir í skýrslunni.