Hvalveiðar Íslendinga eru löglegar

Hvalveiðar Íslendinga eru löglegar 

Upplýsingar um fjölda hrefnu í hafinu umhverfis Ísland frá árinu 2001 benda til þess að um 43.600 dýr hafi þá verið á svæðinu. Þetta mat var samþykkt af vísindanefnd Alþjóða hvalveiðiráðsins árið 2003. Á sama hátt  staðfesti vísindanefndin árið 2006 að fjöldi langreyða vestur af landinu væri um 28.500 dýr. Fjöldi dýra er mismunandi frá ári til árs og ræður þar mestu framboð ætis á svæðunum. 

 Þetta kemur fram á heimasíðu Hvalveiðiráðins, http://iwcoffice.org./consevation/iceland.htmÞar kemur einnig fram að hvalveiðar Íslendinga séu í samræmi við endurskoðaða nýtingaráætlun, RMS, sem liggur fyrir hjá vísindanefnd ráðsins, en ráðið sjálft hefur ekki samþykkt hana. Engu að síður séu veiðar Íslendinga löglegar.

Á heimasíðunni er það einnig útskýrt hvers vegna langreyður sé á lista náttúruverndarsamtakanna IUCN, sem hvalategund í útrýmingarhættu. Þar segir að IUCN meti ekki ástand einstakra stofna langreyðar heldur líti eingöngu til fjölda langreyða í öllum heiminum (miðað við fjöldann sem var fyrir tíma hvalveiða). Við Suður-Íshafið skipti fjöldi langreyða hundruðum þúsunda fyrir tíma hvalveiða og þar hefur stofninn ekki enn náð sér á strik eftir mestu ofveiðar hvalveiðisögunnar á fyrri hluta síðustu aldar. Vegna upprunalegrar stærðar S-Íshafsstofnsins er staða hans í dag alls ráðandi þegar metið er núverandi ástand langreyðar sem tegundar samkvæmt IUCN-kerfinu. Það sé hins vegar svo að langreyðarstofnar séu margir og enginn samgangur til dæmis milli stofna við Suðurskautið og í Norður-Atlantshafi. Staða stofnanna sé mismunandi, en reyndar lítið vitað um flesta þeirra, nema í Norður-Atlantshafinu. Þar sé stofninn vaxandi og líklega að nálgast sögulegt hámark og því ekki í útrýmingarhættu samkvæmt úttektum NAMMCO. Á lista IUCN yfir hvalategundir eru   hrefna og hnúfubakur nú í þeim flokki sem minnstar áhyggjur þarf að hafa af, least concern.

Á heimasíðu IUCN, cms.iucn.org/index.cfm, er meðal annars að finna frétt af flutningi hnúfubaksins úr flokknum í hættu, vulnerable í flokkinn least concern og sagt að stofninn sé í vexti. Þar er einnig að finna lista yfir flokkun samtakanna á hvölum eftir stöðu þeirra.

Þegar stjórnvöld ákváðu árið 2006 að heimila veiðar á 39 hrefnum og 9 langreyðum var send út yfirlýsing á ensku, þar sem fjallað var um lögmæti veiðanna og að þær væru ekki í strássi við lög Alþjóða hvalveiðiráðsins. Jafnframt var lögð á það áhersla að veiðarnar væru sjálfbærar. Einnig voru send út skjöl, sem innihéldu algengar spurningar um hvalveiðar og svör við þeim. Þessar upplýsingar er að finna á heimasíðu ráðuneytisins á slóðunum:

www.eng.sjavarutvegsraduneyti.is/news-and-articles/nr/1229 

www.eng.sjavarutvegsraduneyti.is/news-and-articles/nr/1299 

www.eng.sjavarutvegsraduneyti.is/news-and-articles/nr/1300