Fréttir

Yfir 2000 manns mættu á boðaðan fund á Austurvelli til að mótmæla breytingunum á lögum um stjórn fiskveiða og veiðigjöld sem ríkissjórnin hyggst keyra í gegnum þingið þrátt fyrir varnaðarorð fjölmargra umsagnaraðila. Fundurinn samþykkti, með miklum meirihluta, ályktun þar sem skorað er á stjórnvöld að vanda til verka við endurskoðun fiskveiðilöggjafarinnar og að um það sé haft víðtækt samráð.  

Adolf Guðmundsson formaður LÍÚ lagði áherslu á að vandað yrði til verka við gerð frumvarpanna og sagði ennfremur:

„Verði frumvörpin að lögum munu þau draga máttinn úr sjávarútveginum og rýra möguleika hans til fjárfestingar, þróunar og aukinnar verðmætasköpunar.  Það mun koma niður á starfsfólki, fjölda fyrirtækja sem tengjast sjávarútvegi og sveitarfélögum um land allt.  Síðast en ekki síst verða afleiðingarnar þær að lífskjör fólksins í landinu skerðast."

Á fundinum töluðu auk Adolfs Árni Bjarnason, formaður Farmanna- og fiskimannasambands Íslands, Guðný Sverrisdóttir, sveitarstjóri Grýtubakkahrepps, Þorvaldur Garðarsson á Sæunni Sæmundsdóttur ÁR í Þorlákshöfn, Ólöf Ýr Lárusdóttir, framkvæmdastjóri Vélfags á Ólafsfirði og Arnar Hjaltalín, formaður Drífandi stéttarfélags í Vestmannaeyjum. Fundarstjóri var Bryndís Gunnlaugsdóttir, forseti bæjarstjórnar Grindavíkur.