Fréttir

„Fyrir Alþingi liggur nú frumvarp sjávarútvegsráðherra, þar sem kveðið er á um heimild hans til að leyfa veiðar á 4.000 tonnum af skötusel utan aflamarks á þessu og næsta fiskveiðiári eða sem nemur 80% umfram ráðleggingar fiskifræðinga. Þetta frumvarp sjávarútvegsráðherra og hugmyndir stjórnvalda um upptöku aflaheimilda munu ekki aðeins raska  erlendu markaðsstarfi sem unnið hefur verið um margra ára skeið heldur einnig grafa undan ímynd Íslands sem ábyrgrar fiskveiðiþjóðar," segir m.a. í grein eftir Sverri Pétursson, útgerðarstjóra hjá Hraðfrystihúsinu-Gunnvöru hf. á Ísafirði. 

Grein Sverris birtist í Morgunblaðinu í morgun og fer hér á eftir í heild: 

Fyrningarleiðin vegur að markaðsstarfi í sjávarútvegi

Í allri framleiðslu er markaðsstarf sá þáttur sem er hvað oftast vanmetinn. Einu gildir hvort um ræðir landbúnað, áliðnað eða sjávarútveg. Í sjávarútvegi nútímans eru mikil tengsl á milli fiskimiða og markaðar. Sá sem stýrir veiðunum er yfirleitt í beinu sambandi við kaupendur, hvort heldur þeir eru hér á landi, í Evrópu eða enn lengra í burtu.

Þegar kemur að ákvörðun um viðskipti horfa kaupendur til áreiðanleika seljanda þar sem m.a. er litið til aflaheimilda sjávarútvegsfyrirtækja, hver fjárhagsstaða þeirra er, hvernig skipakosti fyrirtækið ræður yfir og hvernig er staðið að vinnslu afurðanna. Séu þessir þættir allir eins og kaupendur gera kröfur um eru þeir oft tilbúnir að gera langtímasamninga, þar sem greitt er hærra verð fyrir afurðirnar en gengur og gerist.Með samhæfðri og öflugri virðiskeðju veiða, vinnslu og markaðssetningar hámörkum við arðinn af auðlindinni öllum til hagsbóta.

Það sem einkennir markaðinn í dag er hversu vel upplýstur hann er um alla þætti. Erlendir kaupendur vita vel af hugmyndum stjórnvalda um upptöku aflaheimilda. Þessi áform grafa undan afhendingaröryggi afurða sem aftur leiðir til þess þeir leita hófanna hjá öðrum seljendum til þess að tryggja sér afurðir. Um leið þrýstir þetta verðinu einnig niður. Allir tapa ef við fáum ekki hæsta mögulega verð fyrir afurðir okkar; hlutur sjómanna lækkar, framlegð fyrirtækjana lækkar og skatttekjur ríkis og sveitarfélaga dragast saman.

Lykilorðið í markaðsstarfi í dag er „Ábyrgar fiskveiðar."  Við fullyrðum við kaupendur að við umgöngumst fiskistofnana af ábyrgð, veiðum ekki meira en stofnarnir þola. Erlendir kaupendur nýta sér þessa vissu í öllu kynningarstarfi og auglýsingum til neytenda. Við skýrum einnig út fyrir kaupendum hvernig fiskveiðistjórnunarkerfið ýtir undir ábyrgar fiskveiðar. Ef talið er að of mikið hafi verið veitt úr stofni og draga þurfi fyrir vikið úr veiðum þá sé það í okkar þágu enda skili það sér til baka þegar stofnarnir stækka á ný.

Fyrir Alþingi liggur nú frumvarp sjávarútvegsráðherra, þar sem kveðið er á um heimild hans til að leyfa veiðar á 4.000 tonnum af skötusel utan aflamarks á þessu og næsta fiskveiðiári eða sem nemur 80% umfram ráðleggingar fiskifræðinga. Þetta frumvarp sjávarútvegsráðherra og hugmyndir stjórnvalda um upptöku aflaheimilda munu ekki aðeins raska  erlendu markaðsstarfi sem unnið hefur verið um margra ára skeið heldur einnig grafa undan ímynd Íslands sem ábyrgrar fiskveiðiþjóðar.