Fréttir

„Það hlýtur að vera einsdæmi að þjóð sem á jafnmikið undir nýtingu náttúruauðlinda og við og hefur náð að skapa sér þá ímynd á alþjóða vettvangi að hún stundi sjálfbæra nýtingu fiskistofna, ábyrgar fiskveiðar og varúðarnálgun við stjórn fiskveiða hafi til meðferðar á þjóðþingi sínu frumvarp sem beinlínis miðar að því að ofveiða ákveðinn fiskistofn" segir í umsögn LÍÚ um frumvarp sjávarútvegs- og landbúnaðarráðherra sem hann hefur lagt fram á Alþingi.

Heimild til notkunar íslensks upprunamerkis fyrir framleiðsluvörur sínar var breska fiskvinnslufyrirtækinu Flatfish „algjörlega nauðsynlegt"  að sögn Peter Stokes, fjármálastjóra þess. Flatfish sér m.a. hinni kröfuhörðu verslanakeðju Waitrose fyrir afurðum úr skarkola og þykkvalúru af  Íslandsmiðum.

Sjávarútvegsráðherra var óheimilt að framlengja úthlutunartímabil byggðakvóta fiskveiðiársins 2006-2007 til 31. desember 2007 - og þar með inn á nýtt fiskveiðiár - með útgáfu sérstakrar reglugerðar (nr. 440/2007.) Ákvörðunin átti sér ekki lagastoð og var því brot á lögmætisreglunni. Þetta kemur fram í nýlegu áliti umboðsmanns Alþingis.

Vinnslustöðin í Vestmannaeyjum afhenti í gær Fjölskylduhjálp Íslands og Mæðrastyrksnefnd Reykjavíkur að gjöf samtals 900 kg af humri til dreifingar meðal skjólstæðinga samtakanna fyrir jólin. Humarinn er frosinn í 450 gramma pokum. Hvor samtök fengu 1000 poka til ráðstöfunar.

Heildarafli íslenskra skipa nam 85.690 tonnum í nóvember, sem er rúmlega 27% minna í tonnum talið en kom á land í sama mánuði á síðasta ári. Aflinn var þá 117.837 tonn.  Breyting á milli ára skýrist nær alfarið af minni síldarafla, rétt eins og í október. Metinn á föstu verði var aflinn 13,2% minni í nóvemberí ár en í fyrra.  Það sem af er árinu hefur aflinn aukist um 3,9% miðað við sama tímabil 2008, sé hann metinn á föstu verði. 

Útgerðarfélagið Samherji hefur afhent styrki til ýmissa samfélagsverkefna að upphæð 60 milljónir króna. Flestir styrkirnir eru veittir til íþrótta- og æskulýðsfélaga á Akureyri og Dalvík. Afhending styrkjanna fór fram í Flugsafni Íslands á Akureyri.

Fraktflugvélar Icelandair Cargo hafa verið merktar með merki um ábyrgar fiskveiðar Íslendinga og slagorðinu Absolutely Fresh.  Gunnar Már Sigurfinnsson, framkvæmdastjóri Icelandair Cargo, segir Ísland í fararbroddi í heiminum í ábyrgri stjórn fiskveiða og að félagið sé stolt af því að bera merkið á vélum félagsins. Finnur Garðarson hjá Fiskifélagi Íslands, sem er formlegur eigandi merkisins, fagnar þessu framtaki Icelandair Cargo.

Sjávarútvegsráðherra Noregs, Lisbeth Berg-Hansen, hefur lýst vonbrigðum sínum yfir því sem nefnt er „skortur á samningsvilja Evrópusasmbandsins" í viðræðum við Norðmenn um gagnkvæmar veiðiheimildir á næsta ári. Fundi þessara aðila var slitið á þriðjudag án þess að niðurstaða næðist í helstu viðfangsefnunum sem fyrir samninganefndunum lágu.

Framkvæmdastjóri LÍÚ, Friðrik J. Arngrímsson, segir nýjar reglur sjávarútvegsráðherra um 5% álag til aflamarks á útflutning ísfisks frá og með 1. janúar næstkomandi fela í sér mismunun. Þær séu jafnframt brot á samningi Íslands og ESB um bættan markaðsaðgang fyrir sjávarafurðir. Þá megi leiða að því líkum, að þær feli í sér tæknilegar viðskiptahindranir sem gangi í berhögg við EES samninginn um fríverslun með sjávarafurðir til aðildarríkja ESB.

Norskir útflytjendur standa nú frammi fyrir því að útflutningur á óverulegu magni af fiski getur kallað á gríðarlegt flóð vottorða vegna hertra reglna Evrópusambandsins til þess að stemma stigu við ólöglegum fiskveiðum. Reglugerð þar að lútandi tekur gildi þann 1. janúar næstkomandi. Eftir breytinguna eru dæmi um að framvísa gæti þurft 1875 upprunavottorðum vegna útflutnings fimm tonna af blönduðum fiski frá Noregi til kaupanda í Þýskalandi.

„Það verður að eyða þeirri ógn sem vofir yfir sjávarútveginum með stefnu um fyrningu aflaheimilda. Ég lít svo á - og er þar sammála  kollegum mínum í greininni - að fyrningin hefjist með frumvarpi því sem sjávarútvegsráðherra hefur lagt fram á Alþingi," skrifar Eiríkur Tómason, forstjóri Þorbjarnar hf. í Grindavík og varaformaður LÍÚ í grein sem birtist í Morgunblaðinu í morgun.

„Gæði og afhendingaröryggi eru kröfur markaðarins," sagði Þorsteinn Már Baldvinsson, forstjóri Samherja, í erindi sem hann flutti á morgunverðarfundi Matís, AVS og Samtaka fiskvinnslustöðva um vannýtt tækifæri í íslenskum sjávarútvegi. Í erindi sínu rakti Þorsteinn mikilvægi þekkingar, gæða, afhendingaröryggis og rekjanleika afurða í allri sölu- og markaðsstarfsemi fyrirtækisins þegar kæmi að samkeppni á markaði.

Á fundi Úrskurðarnefndar sjómanna og útvegsmanna var ákveðið að hækka verð á slægðum og óslægðum þorski, sem ráðstafað er til eigin vinnslu eða seldur til skyldra aðila, um 5%. Þá var ákveðið að hækka verð á slægðri og óslægðri ýsu um 10%. Verð á karfa var hækkað um 5%. Verð þetta gildir frá og með deginum í dag, 1. desember 2009.