Fréttir

Hvers vegna er fiskveiðiauðlindin eina auðlindin sem Evrópusambandið stjórnar sameiginlega? spyr Eiríkur Tómasson, varaformaður LÍÚ, í samtali við vefsíðu sambandsins. Hann segist hafa velt þessu mikið fyrir sér og komist að því að skýringanna sé fyrst og fremst að leita í sögubókum og langvarandi deilum um nýtingu Norðursjávarins. Með því að hafa sameiginlegt forræði mætti forðast að ýfa upp gömul sár. 

Friðrik J. Arngrímsson, framkvæmdastjóri LÍÚ, sagði á fundi auðlindahóps Evrópunefndar Sjálfstæðisflokksins í Valhöll í gær að óraunhæft væri að bera saman sjávarútveg á Íslandi og á Möltu. Hann sagði að raunhæfara væri að horfa til Norðmanna með samanburð. Þeir hefðu ekki fengið neinar varanlegar undanþágur í samningaviðræðum við Evrópusambandið árið 1994.

Eins og sjávarútvegsstefna ESB er nú myndi íslenskur sjávarútvegur búa við mun lakari rekstrarskilyrði með aðild að ESB en utan sambandsins. Innan ESB myndum við ekkert hafa um það að segja hvernig veiðum úr deilistofnum við Ísland yrði háttað. Þetta á t.d. við um loðnu og makríl. ESB hefur ekki viljað viðurkenna okkar strandríkisrétt og hleypa okkur að samningaborðinu um skiptingu makrílkvótans í Norður-Atlantshafi, segir Adolf Guðmundsson, formaður LÍÚ, í ítarlegu viðtali við tímaritið Ægi sem kemur út í dag.

Mannréttindadómstóll Evrópu hefur vísað frá kærumáli Björns Guðna Guðjónssonar gegn íslenska ríkinu um bann við grásleppuveiðum í netlögum. Dómstóllinn lýsti kæruna ótæka þar sem hún þótti augljóslega illa grunduð  (manifestly ill-founded), sbr. 3. mgr. 35. gr. mannréttindasáttmálans. Þetta kemur fram í Andrá, vefriti um sjávarútveg og landbúnað.

Alþingi hefur samþykkt ný lög, þar sem fyrirtækjum er heimilað að gera upp ársreikninga sína í erlendri mynt fyrir árið 2008.

Kristján Vilhelmsson, framkvæmdastjóri útgerðarsviðs Samherja, afhenti í dag Verkmenntaskólanum á Akureyri, VMA, tveggja milljóna króna styrk frá LÍÚ. Svo skemmtilega vill til að á þessu ári eru 100 ár frá stofnun Útvegsmannafélags Norðurlands. Peningunum er ætlað að styrkja vélstjórnarbraut VMA sem er eini skólinn utan höfuðborgarsvæðisins sem útskrifar 4. stigs vélstjóra.

Á grundvelli samnings á milli Íslands og Rússlands frá 1999 verður íslenskum skipum heimilt að veiða 2937 tonn af þorski auk meðafla á næsta ári í rússneskri lögsögu í Barentshafi. Samkvæmt samningnum stendur Íslendingum jafnframt til boða að kaupa 1763 tonn af þorski, ef um semst. Þetta var ákveðið á níunda fundi samstarfsnefndar Íslands og Rússlands um tiltekna þætti sjávarútvegsmála sem lauk í Reykjavík í gær, 17. desember.

Sjávarútvegur er leið Íslands út úr þeirri kreppu sem landið er í. Þetta er inntak ítarlegrar fréttaskýringar Associated Press, AP, í gær um efnahagsástandið á Íslandi.  Fyrirsögn úttektarinnar er Crisis-hit Iceland sees its futute in fish sem útleggja mætti Ísland í kreppu framtíðin er í fiskinum.

Af þeim sem tóku afstöðu svöruðu alls 51,6% aðildarfyrirtækja Samtaka atvinnulífsins játandi og 48,6% neitandi þegar spurt var í könnun samtakanna: Vill þitt fyrirtæki að SA beiti sér fyrir aðild Íslands að ESB og upptöku evru sem gjaldmiðils á Íslandi?  Niðurstöður könnunarinnar voru kynntar í gær.

Nýr kjarasamningur sjómanna og útvegsmanna var undirritaður í húsakynnum ríkissáttasemjara í dag. Samningurinn tekur annars vegar til Sjómannasambands Íslands, Alþýðusambands Vestfjarða, Farmanna- og fiskimannasambands Íslands og VM, félags vélstjóra og málmtæknimanna og hins vegar Landssambands íslenskra útvegsmanna.

Þetta eru bestu fréttir sem við höfum fengið í langan tíma, segir Friðrik J. Arngrímsson, framkvæmdastjóri LÍÚ, í frétt breska vefmiðilsins FISHupdate.com í dag. Þar greinir frá því, að niðurstöður haustmælinga Hafrannsóknastofnunarinnar hafi verið mjög jákvæðar og leiði að líkindum til þess að aflaheimildir í þorski við Ísland verði auknar. Það þýði með öðrum orðum að meira framboð verði á Bretlandseyjum af þorski af Íslandsmiðum.

Heildarafli íslenskra skipa nam 117.584 tonnum í nýliðnum nóvember og var ríflega 10,7% meiri en í sama mánuði á síðasta ári er hann var 106.168 tonn. Sé aflinn metinn á föstu verði var hann 4,1% meiri í nóvember í ár en í fyrra. Það sem af er árinu hefur afli, metinn á föstu verði, dregist saman um 3,5% frá árinu 2007.

Þetta eru ákaflega ánægjulegar niðurstöður sem vonandi gefa fyrirheit um að þorskstofninn sé að rétta úr kútnum, segir Friðrik J. Arngrímsson, framkvæmdastjóri LÍÚ. Hafrannsóknastofnunin sendi í morgun frá sér tilkynningu um niðurstöðu haustmælinga á stofnstærð botnfiska. Þar kemur fram að heildarvísitala þorsks er nú 10% hærri en hún hefur áður mælst í 12 ára sögu mælinganna.

Lífrænt eldsneyti er engin framtíðarlausn og verð á díselolíu kemur á næstu tveimur árum til með að leita jafnvægis gagnvart bensíni og lækka umtalsvert. Þetta var á meðal þess sem kom fram á fyrirlestri Lucian Pugliaresi, stjórnarformanns Energy Policy Research Foundation rannsóknastofnunar í orkumálum, í Háskóla íslands í gær.

Landssamband íslenskra útvegsmanna verður á meðal stuðningsaðila Nýsköpunarkeppni grunnskólanemenda, NKG, árið 2009. Samningur þar að lútandi var undirritaður fyrr í dag. Sjávarútvegur er í fyrsta sinn sérstakur flokkur í keppninni en alls eru þeir sex. Keppnin, sem fór fyrst fram árið 1992 hefur vaxið mjög að umfangi. Í fyrra voru umsóknir 3640 talsins en voru sem dæmi aðeins 75 fyrsta árið.

Þetta eru að sjálfögðu jákvæð tíðindi en koma okkur ekkert á óvart. Þetta er aðeins staðfesting þess að hvalkjötið uppfyllir allar þær geysilega ströngu kröfur sem japanskt matvælaeftirlit gerir, segir Kristján Loftsson, framkvæmdastjóri Hvals hf. Innflutningsleyfi fyrir 65 tonnum af hvalkjöti frá Íslandi var nýverið gefið út í Japan.

Við tókum upp dollar í janúar árið 2000. Þetta varð til þess að stöðugleiki komst á fjármálamarkaði og efnahagsbatinn varð skjótur, sagði Alonso Perez, sem var efnahagsráðgjafi forseta Ekvador árið 1999 þegar ákveðið var að taka einhliða upp dollar í kjölfar mikillar kreppu. Á aðeins þremur vikum gekk ferlið í gegn og í kjölfarið var farið í umfangsmiklar endurbætur á stjórn- og efnahagskerfi landsins. Alger viðsnúningur varð í kjölfarið.

Stjórn Samtaka fiskvinnslustöðva samþykkti einróma á fundi sínum á föstudag ályktun, þar sem skorað er á stjórnvöld að kanna nú þegar kosti þess að taka einhliða upp annan gjaldmiðil í stað krónunnar. Samtökin feta þar með í fótspor LÍÚ sem sendi sambærilega áskorun frá sér fyrir skömmu.

Ársæll Valfells, lektor við Háskóla Íslands, segir að einhliða upptaka evru sé vel fær kostur. Þegar séu þekkt dæmi um slíkar umbreytingar í þremur heimsálfum. Í öllum tilvikum hafi verið gripið til þeirra vegna neyðaraðstæðna þar sem gengi gjaldmiðils viðkomandi þjóðar hafi verið hrunið.

Einar Valur Kristjánsson, framkvæmdastjóri Hraðfrystihússins Gunnvarar í Hnífsdal, telur að fella eigi út ákvæði um að lögbinda skuli lágmarksverð á afla, sem fyrirhugað er að selja úr landi eins og lagt er til í frumvarpi sem lagt hefur verið fram á Alþingi. Einar Valur segir ákvæðið inngrip í frjáls viðskipti á milli aðila og að það geti leitt til þess að viðskipti eigi sér síður stað. Þannig sé orðin til mótsögn við upphaflegan tilgang frumvarpsins.

Útgerðarfélagið Samherji á Akureyri tilkynnti í gær að það hygðist verja 50 milljónum króna til samfélagsverkefna á Akureyri. Tilefnið er að í gær voru 25 ár liðin frá því að fyrsta skip Samherja, Akureyrin, fór í sína fyrstu veiðiferð. Að stærstum hluta rennur framlagið til lækkunar á æfingagjöldum barna og unglinga í íþróttum  og til greiðslu kostnaðar við keppnisferðir þeirra í vetur.

Það er útbreitt sjónarmið að upptaka nýs gjaldmiðils sé eina leiðin út úr núverandi stöðu en forvígismenn sjávarútvegsins eru andvígir aðild að Evrópusambandinu þar sem það hefði í för með sér að sjávarútvegur á Íslandi yrði settur undir illa þokkaða sjávarútvegsstefnu sambandsins, segir í frétt á vefsíðunni IntraFish.

Síldarvinnslan hf. hefur fært Mæðrastyrksnefnd Reykjavíkur fjögur bretti af sjófrystum ýsuflökum. Alls er um að ræða 4,2 tonn. Flytjandi lagði Síldarvinnslunni lið og tók að sér að flytja farminn án endurgjalds til Reykjavíkur.

Kostnaður við einhliða upptöku evru yrði 80 milljarðar króna, sem færi til að skipta út grunninnistæðum. Einhliða upptaka evru tekur að hámarki fjórar vikur. Umsóknarferli fyrir fullgilda aðild að ESB tæki aldrei skemmri tíma en fjögur ár að viðbættum þriggja ára aðlögunartíma þar sem Maasticht-skilyrðin þurfa að nást. Þetta er mat Heiðars Más Guðjónssonar, framkvæmdastjóra Novator.

Einar K. Guðfinnsson sjávarútvegsráðherra sagði í ræðu á þingi Sjómannasambands Íslands í morgun, að það væri dapurlegt að standa frammi fyrir þeirri óvissu sem sýking í síldinni hefði skapað eftir að hafa byggt upp síldarstofninn með einstaklega varkárri nýtingarstefnu á undanförnum árum. 

Adolf Guðmundsson, formaður LÍÚ, hélt því fram í þættinum Okkar á milli á Rás 1 í morgun, að innganga í Evrópusambandið væri ávísun á viðvarandi atvinnuleysi og launalækkun. Hann lagði áherslu á að lítið hefði farið fyrir göllunum við ESB-aðild í umræðunni. Kostirnir hefðu hins vegar óspart verið tíundaðir. Adolf sagði að samkvæmt tölum fyrir mánuði væri 17,7% fólks undir 25 ára innan ESB án atvinnu.

Aukin fiskneysla mæðra tengist bættum líkamlegum og vitsmunalegum þroska ungbarna samkvæmt niðurstöðum danskrar rannsóknar sem kynnt var nýverið. Frá þessu er greint á vefsíðunni HealthDay.

Vinnuhópur á vegum ríkisstjórnarinnar, sem hefur að undanförnu unnið að því að móta áætlun um brýnar aðgerðir til að bregðast við þeim þrengingum sem þjóðin gengur nú í gegnum, lagði í dag fram tillögur sem hafa það að markmiði að mæta vanda atvinnulífsins. Fyrstu tillögur um úrbætur í þágu heimilanna hafa þegar verið samþykktar í ríkisstjórninni.

Greining sníkjudýrs í síldinni nú allra síðustu daga er okkur mikið áfall. Þótt sníkillinn sé hvorki skaðlegur mönnum né öðrum spendýrum er ljóst að hærra hlutfall aflans fer til bræðslu en ella. Það eitt út af fyrir sig veldur tekjutapi fyrir sjávarútveginn, segir Friðrik J. Arngrímsson, framkvæmdastjóri LÍÚ.

Björn Bjarnason, dóms- og kirkjumálaráðherra, segir á vefsíðu sinni um helgina að áskorun LÍÚ til stjórnvalda um að kanna nú þegar kosti þess að taka einhliða upp annan gjaldmiðil séu stórtíðindi í umræðum um krónuna og framtíð hennar.

Þessar fréttir af ítrekuðum meintum ólöglegum veiðum færeyskra skipa í íslenskri lögsögu sýna betur en nokkuð annað hve brýnt er að efla starfsemi Landhelgisgæslunnar. Hún hefur um árabil verið í fjársvelti. Gæslan sinnir ekki aðeins eftirliti heldur er öryggishlutverk hennar afar mikilvægt fyrir íslenska sjómenn, segir Friðrik J. Arngrímsson, framkvæmdastjóri LÍÚ.

Íslensk skip eru búin að veiða allt aflamark Íslands í norsk-íslenskri síld í norskri lögsögu á árinu 2008. Tilkynning þessa efnis hefur borist Fiskistofu. Aflamarkið var alls 40.986 lestir. Þar með er norsk lögsaga lokuð fyrir frekari síldveiðum íslenskra skipa á þessu ári, segir á vef Fiskistofu.

Á fundi Úrskurðarnefndar sjómanna og útvegsmanna í dag, 1. desember, var ákveðið að hækka verð á  slægðum og óslægðum þorski, sem ráðstafað er til eigin vinnslu eða seldur til skyldra aðila, um 9%. Verð á slægðri og óslægðri ýsu var hækkað um 10% og á slægðum og óslægðum karfa um 15%. Verðbreytingin gildir frá og með 1. desember.

Stjórn Landssambands íslenskra útvegsmanna hefur samþykkt eftirfarandi áskorun til stjórnvalda: Stjórn LÍÚ skorar á stjórnvöld að kanna nú þegar kosti þess að taka einhliða upp annan gjaldmiðil.

Friðrik J. Arngrímsson, framkvæmdastjóri LÍÚ, segir í bréfi til Hrundar Rudolfsdóttur, formanns Samtaka verslunar og þjónustu, sem sent var fyrir stuttu að fullyrðingar hennar um að LÍÚ hafi reynt að hindra lýðræðislega umræðu innan Samtaka atvinnulífsins séu sérlega meiðandi.

Tvískinnungurinn, sem viðgengst um borð í fiskveiðiskipum ESB-þjóðanna, er harðlega gagnrýndur af norskum útvegsmanni í Fiskeribladet/Fiskaren í vikunni. Hann segir það undarlega þversögn að stunda brottkast með annarri höndinni en nota hina til að innbyrða afla sem síðan hljóti sjálfbærnivottorð aðila á borð við Marine Stewardship Council (MSC).

Sigurður Sverrisson, upplýsinga- og kynningarfulltrúi LÍÚ, vekur athygli á því í grein í Fréttablaðinu í dag að fjölmiðlar, sem sakað hafa Íslendinga um ofveiði á makríl, séu annars vegar að rugla saman veiðum innan íslenskrar lögsögu og hins vegar 20 þúsund tonna úthafskvóta, sem önnur strandríki úthlutuðu Íslandi við gerð samkomulags um makrílveiðar.

Um 500 gestir á öllum aldri sóttu landvinnslu Brims hf. á Akureyri heim á opnum degi sem fyrirtækið efndi til sl. laugardag. Þar var bæjarbúum og öðrum gestum boðið að koma í heimsókn og kynna sér starfsemi fyrirtækisins við Fiskitanga.

Síldarvinnslan í Neskaupsstað hefur látið setja í skip sín, Börk og Birting, sams konar dýptarmæla og notaðir eru í rannsóknarskipum Hafrannsóknastofnunarinnar. Um leið hefur fyrirtækið boðið stofnuninni aðgang að gögnunum.

Eftirfarandi bréf var sent út til félagsmanna LÍÚ og SF fyrir stundu:

Til félagsmanna LÍÚ og SF.

Frá því að Samtök atvinnulífsins voru stofnuð hefur það legið fyrir að samtökin beiti sér ekki í málefnum sem ganga gegn grundvallarhagsmunun einstakra aðildarsamtaka.

Adolf Guðmundsson, nýkjörinn formaður Landssambands íslenskra útvegsmanna, er ómyrkur í máli um Evrópusambandið og fiskveiðistefnu þess í viðtali í Fiskifréttum í dag. Frá sjónarhóli íslensks sjávarútvegs höfum við ekkert inn í Evrópusambandið að gera á meðan sjávarútvegsstefna þess er óbreytt.

Hafréttarstofnun Íslands og Lagadeild Háskóla Íslands efna til málstofu undir yfirskriftinni Baráttan gegn ólöglegum fiskveiðum nk. miðvikudag, 26. nóvember, kl. 12.30 14.00, í Háskóla Íslands, Lögbergi, stofu 101.

Landvinnsla Brims hf. á Akureyri efnir til opins dags frá kl. 13 16 nk. laugardag, 22. nóvember, þar sem bæjarbúum og öðrum gestum er boðið að koma í heimnsókn og kynna sér starfsemi fyrirtækisins við Fiskitanga.

Eggert Benedikt Guðmundsson, forstjóri HB Granda, heldur því fram í grein sem hann birtir í Morgunblaðinu í morgun að stuðningsmenn ESB-aðildar verði aldrei trúverðugir nema þeir takist á við þann vanda, sem sjávarútveginum verður búinn með aðild.

Eiríkur Tómasson, forstjóri Þorbjarnar hf. í Grindavík, segir í samtali við vefsíðu LÍÚ að hann fái með engu móti skilið þá umræðu að einhver lausn felist í því að riðla núverandi fiskveiðistjórnunarkerfi. Kvótakerfið er grundvöllur arðbærni í sjávarútvegi, önnur meginstoðanna sem íslenska þjóðin byggir afkomu sína á, segir Eiríkur.

Sjávarútvegsráðherrar Evrópusambandsríkjanna hafa samþykkt áætlun sem miðar að því að efla síminnkandi þorskstofna. Greint er frá þessu á vef BBC nú fyrir stundu. Á meðal þess sem grípa á til eru endurbætt veiðarfæri með stærri möskvum jafnframt því sem veiðar verða bannaðar á hrygningarsvæðum.

Skip HB Granda hafa nú lokið við að veiða þann kvóta sem fékk í norsk-íslenskri síld innan norskrar lögsögu. Þetta kemur fram á vefsíðu fyrirtækisins. Ingunn AK er nú á leiðinni til Trænö í Norður-Noregi með um 390 tonna síldarafla.

Norðmenn vilja binda enda á allt brottkast afla sem veiddur er innan norskrar lögsögu. Fiskiskip, sem gerð eru út frá Evrópusambandslöndum og veitt hafa við Noreg, hafa sniðgengið bann Norðmanna við brottkasti með því að sigla út úr lögsögunni áður en aflanum er kastað fyrir borð.

Formaður og framkvæmdastjóri LÍÚ, Adolf Guðmundsson og Friðrik J. Arngrímsson, hafa sent frá sér hvatningu til útvegsmanna. Þar undirstrika þeir mikilvægi þess að útvegsmenn haldi áfram að flytja gjaldeyri fyrir sölu afurða heim eins fljótt og unnt er til þess að styðja við Áætlun Íslands um efnahagsstöðugleika.

Ég veit að það hljómar ekki vel á Íslandi þessa dagana en krónan er engu að síður ykkar styrkur í efnahagsástandi eins og nú ríkir. Danska krónan hjálpaði okkur ekki í kreppunni á sínum tíma, sagði Hermann Oskarsson, hagstofustjóri Færeyja (sjá mynd til hægri), á morgunverðarfundi sem fram fór á Grand Hótel í gær.

Aflaverðmæti íslenskra skipa nam 63 milljörðum króna á fyrstu átta mánuðum ársins 2008 samanborið við 58,5 milljarða á sama tímabili árið 2007. Þetta kemur fram í frétt Hagstofunnar í morgun. Aflaverðmæti hefur aukist um um 4,6 milljarða eða 7,9% á milli ára. Aflaverðmæti í ágúst nam 8,9 milljörðum miðað við 6,2 milljarða í ágúst 2007.

Ekki náðist samkomulag um veiðar á úthafskarfa á Reykjaneshrygg á 27. ársfundi Norðaustur-Atlantshafs fiskveiðinefndarinnar, NEAFC, sem lauk í London á föstudag. Ákveðið var að fresta viðræðum fram í febrúar og veiðar eru óheimilar til 1. apríl.

Hvað þarf til þess að Íslandi verði boðið sæti við samningaborð um makrílveiðar? Þessari spurningu er velt upp í grein eftir Sigurð Sverrisson, upplýsinga- og kynningarfulltrúa LÍÚ, sem birtist í Fiskifréttum í dag. Í greininni spyr hann einnig hvort enn meiri veiðar íslenskra skipa innan lögsögunnar þurfi til þess að hægt sé að semja um veiðar á makríl eins og öðrum deilistofnum í NA-Atlantshafi.

Framseljanlegir aflakvótar líkt og þekkjast hér á landi eru á meðal þeirra hugmynda sem nú eru skoðaðar innan Evrópusambandsins. Vinnuhópur, sem kynnti drög sín fyrir skömmu, leggur til að róttækar breytingar verði gerðar á fiskveiðistjórnunarstefnu ESB þegar hún kemur til endurskoðunar árið 2012.

Seðlabanki Íslands hefur á vefsíðu sinni áréttað mikilvægi þess að fullnægjandi skýringar fylgi greiðslufyrirmælum þannig að greiðslur á milli landa tefjist ekki.

Mikilvægt er fyrir banka og fjármálastofnanir að skoða vandlega ástæður hugsanlegra erfiðleika sem íslensk sjávarútvegsfyrirtæki eru að glíma við í fjármálakreppunni. Hugsanlega er það betri kostur fyrir viðskiptabankana að afskrifa hluta skuldanna fremur en að ganga hart að annars vel reknum fyrirtækjum.

Sú gagnrýni að útgerðarmenn landsins geri út á gjafakvóta er á veikum grunni byggð því könnun frá því í vor sýndi að um 87,5% aflaheimildanna sem úthlutað var 1984 hafa skipt um hendur og verið keyptar af núverandi útgerðaraðilum. Aðeins um 12,5% upphaflegs kvóta er enn í eigu þeirra sem fengu honum úthlutað, segir Adolf Guðmundsson, nýkjörinn formaður LÍÚ.

Samkomulag hefur náðst á meðal strandríkja um aflamark í kolmunna fyrir næsta ár. Samkvæmt samkomulaginu verður heimilt að veiða 590.000 tonn. Hlutur strandríkjanna verður 543.043 tonn, þar af fær Ísland 95.739 tonn í sinn hlut.

Þessi frétt á vef BBC um ofveiði okkar á makríl er full af rangfærslum. Til að kóróna vitleysuna er vitnað er í talsmann skosku heimastjórnarinnar, sem kemur ekki einu sinni fram undir nafni í fréttinni. Þegar meintur talsmaður sakar Íslendinga um óábyrgar veiðar er verið að kasta steinum úr skosku glerhúsi, segir Sigurður Sverrisson, upplýsinga- og kynningarfulltrúi LÍÚ.

Þátturinn Auðlindin á RÚV, sem á sínum tíma fjallaði um sjávarúvegsmál, hefur göngu sína á ný á morgun, miðvikudaginn 12. nóvember. Þátturinn verður á samtengdum rásum ríkisútvarpsins alla virka daga kl. 18.15 í kjölfar styttri kvöldfréttatíma. Umsjónarmenn þáttarins verða þeir Karl Eskil Pálsson og Þórhallur Jósepsson.

Stinky fish herferð World Wildlife Fund, WWF og Marine Stewardship Council, MSC, snerist svo í höndum samtakanna að þau urðu að endingu að draga hana til baka. Þetta kemur fram í nýjasta tölublaði sjávarútvegsfréttablaðsins IntraFish, þar sem það tekur saman  Það besta og versta á árinu 2008.

Heildarbotnfiskafli íslenskra fiskiskipa í október varð 9,3% meiri en í október í fyrra. Alls nam veiðin 41.413 tonnum í samanburði við 37.899 tonn í sama mánuði á síðasta ári. Heildaraflinn í nýliðnum mánuði var hins vegar 6,9% minni en í október 2007. Í ár veiddust alls 91.408 tonn en 98.132 í sama mánuði í fyrra.

Hve mörg kíló eru í einu tonni? Eru þau 1000 eða aðeins 933,3? Svarið er ekki eins augljóst og ætla mætti, a.m.k. ekki þegar kemur að því að vigta fisk við löndun. Það er nefnilega ekki sama hver landar. Þessari mismunun var velt upp í grein Friðriks J. Arngrímssonar, framkvæmdastjóra LÍÚ, í Fiskifréttum fyrir nokkru.

Fyrsta umræða um frumvarp Einars K. Guðfinnssonar, sjávarútvegs- og landbúnaðarráðherra, til laga um breytingar á lögum um stjórn fiskveiða fer fram á Alþingi í dag. Breytingarfrumvarpið felur í sér að heimilt verður að flytja 33% aflamarks í botnfiski milli fiskveiðiára í stað 20%.

Botnfisksafli í heiminum kemur til með að aukast lítillega á árinu 2009. Þetta mat sérfræðinga kom fram á Groundfish Forum-ráðstefnunni, sem fram fór í Prag fyrir skemmstu.

Við stofnstærðarmat er nauðsynlegt að nýta þær upplýsingar sem fyrir hendi eru í sjávarútvegsfyrirtækjunum. Óþarfi er að eyða fjármunum og fyrirhöfn í að sækja gögn sem þegar liggja fyrir. Þetta kom m.a. fram í erindi  Kristjáns Vilhelmssonar, framkvæmdastjóri útgerðarsviðs Samherja, á aðalfundi LÍÚ í síðustu viku og Fiskifréttir fjalla ítarlega um í dag.

Friðrik J. Arngrímsson, framkvæmdastjóri LÍÚ, segir gagnrýni fulltrúa Evrópusambandsins á makrílveiðar Íslendinga í eigin lögsögu beinlínis hjákátlega. Gagnrýnin kom fram á fundi strandríkja í London í síðustu viku, þar sem heildarmakrílkvótinn í NA-Atlantshafi á næsta ári var ákveðinn 625.000 tonn að sögn norska blaðsins Fiskaren.

Joe Borg, fiskimálastjóri ESB, segir alvarleg brot á reglum fiskveiðistjórnunarkerfis sambandsins undirstrika nauðsyn þess að endurskoða kerfið. Án virkrar stjórnunar tekst okkur aldrei að snúa af þeirri braut hnignunar sem nú einkennir evrópskan sjávarútveg, segir hann.

Búið er að opna aftur síldarveiðihólfið, þar sem íslensku skipin Hákon EA, Vilhelm EA og Guðmundur VE voru tekin fyrir að hafa veitt fyrir skömmu.

Á aðalfundi LÍÚ 2008, sem lauk á föstudag var Adolf Guðmundsson, Seyðisfirði kosinn nýr formaður. Einnig komu tveir nýir menn inn í stjórn, þeir Haukur Björnsson, Eskifirði og Ægir Páll Friðbertsson, Vestmannaeyjum.

Á fundi Úrskurðarnefndar sjómanna og útvegsmanna í dag, 3. nóvember, var ákveðið að hækka verð á slægðum þorski, slægðri og óslægðri ýsu svo og karfa, sem ráðstafað er til eigin vinnslu eða seldur er til skyldra aðila, um 3% frá og með 3. nóvember.

Seðlabankinn hvetur í frétt á vefsíðu sinni útflytjendur og aðra þá sem eiga gjaldeyri eindregið til að bjóða hann til sölu á tilboðsmarkaði. Með því telur bankinn að ætla megi að unnt sé að auka veltu og styrkja verðmyndun á tilboðsmarkaðnum. Eru þeir beðnir að snúa sér  til fjármálafyrirtækja sem eiga viðskipti við Seðla­bankann  og fela þeim að koma tilboðum sínum á framfæri.

Adolf Guðmundsson, framkvæmdastjóri Gullbergs ehf. á Seyðisfirði, var kjörinn formaður Landssambands íslenskra útvegsmanna á 69. aðalfundi samtakanna sem lauk í dag. Adolf tekur við formennsku af Björgólfi Jóhannssyni sem verið hefur formaður LÍÚ sl. fimm ár.

Breytingar á kvótakerfinu koma ekki til greina að mati Geirs H. Haarde, forsætisráðherra. Þetta kom fram í ávarpi hans á aðalfundi LÍÚ sem lauk fyrr í dag.  Allt tal um slíkt er fullkomlega óábyrgt, sagði ráðherrann. Hann bætti því við að þegar að því kæmi að þorskkvóti yrði aukinn myndu þeir njóta þess sem harðast hefðu orðið úti í niðurskurði aflaheimilda.

Samþykkt var á aðalfundi Landssambands íslenskra útvegsmanna í dag að beina því til sjávarútvegsráðherra að tilflutningur aflaheimilda á milli útgerðaflokka verði stöðvaður. Þannig verði línuívilnun og byggðakvóti felld niður og slægingarstuðull leiðréttur.

Samtökin Veraldarvinir hlutu í dag Umhverfisverðlaun LÍÚ 2008 fyrir mikilvægt framlag við hreinsun strandlengju Íslands. Einar K. Guðfinnsson sjávarútvegsráðherra afhenti Þórarni Ívarssyni, forsvarsmanni samtakanna, verðlaunin á 69. aðalfundi LÍÚ sem hófst í dag.

Björgólfur Jóhannsson, fráfarandi formaður LÍÚ, sagði í ræðu sinni á aðalfundi sambandsins í dag að hann væri algerlega ósammála þeim sjónarmiðum að Íslandi sé fyrir bestu að gerast aðilar að Evrópusambandinu. Hann sagðist telja  þegar íslenskur almenningur kynnti sér betur hvernig að þessum málum er staðið yrði honum ljóst að að hagsmunir Íslands eru best tryggðir utan ESB.

Við höfum kallað sjávarútveginn burðarás efnahagslífsins á Íslandi og það hefur hann sannarlega verið, sagði Einar K. Guðfinnsson, sjávarútvegsráðherra m.a. í ræðu sinni á aðalfundi LÍÚ fyrr í dag. Hann bætti því við að nú yrði lögð enn meiri ábyrgð á herðar greinarinnar.

Hópur þingmanna frá Evrópuþinginu sótti höfuðstöðvar LÍÚ heim í gær og átti fund með forvígismönnum samtakanna. Staða efnahagsmála sem og staða sjávarútvegsins var erlendu gestunum sérstaklega hugleikin.

Þegar sýnt var að fjöldi hefðbundinna Fishnchips verslana á NA-Englandi yrði uppiskroppa með íslenskan fisk vegna tregðu í bankamillifærslum á milli Bretlands og Íslands gripu samtök fiskkaupmanna á Humber-svæðinu í Englandi (Hull og Grimsby) til sinna eigin ráða.

Aðalfundur LÍÚ, sá 69. í röðinni, verður haldinn á Hilton Nordica Hótelinu dagana 30. og 31. október næstkomandi.

Stefán Ásmundsson, skrifstofustjóri alþjóðaskrifstofu sjávarútvegs- og landbúnaðarráðuneytisins staðfestir í samtali við Fiskifréttir, að ákveðið hafi verið að þekkjast boð um að senda áheyrnarfulltrúa á strandríkjafund um makrílkvóta næsta árs. Fundurinn verður í London í næstu viku. Þetta kemur fram á vefsíðunni skip.is í morgun.

Ég átta mig ekki alveg á því af hverju Danirnir eru að biðja Evrópusambandið um að hlutast til um hvernig við högum veiðum á deilistofnum innan okkar landhelgi. ESB hefur ekkert um það segja þannig að þetta fellur um sjálft sig, segir Friðrik J. Arngrímsson, framkvæmdastjóri LÍÚ.

Fiskistofa gefur út aflahefti að loknu hverju fiskveiðiári. Hefti fyrir síðasta fiskveiðiár er nýkomið út. Aflaheftið inniheldur uppgjör fiskveiðiársins. Aflinn borinn saman við aflaheimildir. Settar eru fram ýmsar upplýsingar um veiðarnar og viðskipti með aflaheimildir á nýliðnu fiskveiðiári með samanburði við nokkur síðustu fiskveiðiára. 

Umboðsmaður Alþingis átelur í nýútkominni skýrslu sinni seinagang stjórnvalda við að svara fyrirspurnum sem þeim berast. Um er að ræða mál er varða m.a. úthlutun byggðakvóta. Í skýrslunni tiltekur hann fimm mál sem send voru sjávarútvegs- og landbúnaðarráðuneytinu frá desember 2007 og fram í febrúar 2008. Við ritun skýrslunnar  um miðjan ágúst voru svör enn ókomin.

Aflaverðmæti íslenskra skipa nam 54 milljörðum króna á fyrstu sjö mánuðum ársins 2008 samanborið við 52,2 milljarða á sama tímabili árið 2007. Þetta kemur fram á vef Hagstofunnar í morgun. Aflaverðmæti hefur aukist um um 1,8 milljarða eða 3,4% á milli ára. Aflaverðmæti í júlí nam 8,7 milljörðum miðað við 5,7 milljarða í júlí 2007.

Samkomulag hefur náðst á milli Norðmanna og Rússa um að auka þorskkvóta í Barentshafi um 20% frá yfirstandandi ári. Kvótinn verður 525.000 tonn fyrir árið 2009. Hlutdeild Íslands í leyfilegum heildarafla þorsks er 1,85%, sem svarar til ríflega 9.700 tonna upp úr sjó.

Starfsemi margra útgerðarfyrirtækja er í óvissu sökum vandamála með greiðsluflæði á milli landa. Ein meginorsök greiðsluflæðivandans er að endurreistir viðskiptabankar eru ekki til í alþjóðlegum greiðslukerfum.

Breska fjármálaráðuneytið hefur sent frá sér yfirlýsingu, Financial Sanctions Notice, til allra banka í Bretlandi, þar sem tilkynnt er að opnað hafi verið fyrir allar millifærslur fjármagns til Íslands í gegnum breska banka og einnig Landsbankann ef ljóst er að ekki sé verið að flytja frysta eignir Landsbankans til Íslands.

Friðrik J. Arngrímsson, framkvæmdastjóri LÍÚ, var í viðtali í þættinum Í bítið á Bylgjunni í morgun. Hann sagði efnahagsáföll síðustu vikna vissulega hafa komið illa við útgerðarfyrirtæki eins og aðra. Það er ljóst að ýmis sjávarútvegsfyrirtæki eru að tapa mjög miklum peningum á fjárfestingum í fjármálakerfinu, sagði Friðrik en bætti við: Við munum komast í gegnum þetta.

Frystitogarinn Þerney RE 101 kom til hafnar í Reykjavík á þriðjudagsmorgun með um 410 tonn af frystum afurðum eftir mánaðarlangt úthald. Uppistaða aflans var karfi sem veiddur var á karfahólfi út af Víkurál sem verið var að opna eftir áralanga lokun. Þetta kemur fram á vefsíðu HB Granda.

Heftið   Sjávarútvegurinn í tölum 2008 er komið út á vegum Sjávarútvegs- og landbúnaðarráðuneytisins. Í þessu handhæga riti eru teknar saman helstu upplýsingar um íslenskan sjávarútveg, m.a. yfirlit yfir aflabrögð í meira en heila öld og hlutfall sjávarútvegs í vergri landsframleiðslu. Margvíslega aðra tölfræði er að finna í ritinu sem sett er fram á aðgengilegan hátt. Sérstök athygli er vakin á tengli á skýrsluna í PDF-formi á upphafssíðu vefs LÍÚ.

Heildarbotnfiskafli íslenskra fiskiskipa nam 68.030 tonnum í september, sem er 33% meira en í sama mánuði á síðasta ári. Aflinn var þá 51.075 tonn. Metinn á föstu verði er aflinn 22,3% meiri en í september 2007. Það sem af er árinu hefur aflinn hins vegar dregist saman um 4,1% miðað við sama tímabil 2007, sé hann metinn á föstu verði. 

Friðrik J. Arngrímsson, framkvæmdastjóri LÍÚ, blés í viðtali við ríkissjónvarpið í gærkvöld á tillögur Frjálslynda flokksins um að ríkið leysti til sín allan kvóta, yfirtæki skuldir sjávarútvegsins og setti í auðlindasjóð. Friðrik sagði þjóðarbúið þegar hafa tekið á sig nægar skuldir.

Friðrik J. Arngrímsson, framkvæmdastjóri LÍÚ, segir í viðtali í nýjasta tölublaði Fiskifrétta óhætt að heimila auknar þorskveiðar. Í viðtalinu vísar hann til þess að LÍÚ hafi á síðasta ári lagt til að heimilað yrði að veiða 155-160 þúsund tonn af þorski og einnig á yfirstandandi fiskveiðiári. Sú skoðun okkar hefur ekki breyst.

Alþjóðahafrannsóknaráðið hefur lagt til að veiðar úr norsk-íslenska síldarstofninum verði auknar í 1643 þúsund lestir á næsta ári. Þetta er aukning upp á ríflega 8% frá síðustu ráðgjöf ráðsins. Kvóti  Íslands í síldarstofninum fer við þetta úr 220 þúsundum lesta í rúmlega 238 þúsund lestir.

Sigurður Sverrisson tók þann 1. október sl. við starfi forstöðumanns upplýsinga- og kynningarmála hjá LÍÚ.

Ísland og Nýja-Sjáland, ásamt  Ástralíu og Bandaríkjunum að hluta, eru nefnd sem dæmi um lönd þar sem ábyrgri fiskveiðistjórnun er framfylgt. Þar er þó enn hægt að gera betur. Þetta kemur fram í nýrri skýrslu frá  FAO, Matvæla- og landbúnaðarstofnun Sameinuðu þjóðanna. Fréttavefur BBC greindi frá þessu í gær.

Íslenskt merki um ábyrgar fiskveiðar Íslendinga var kynnt á Íslensku sjávarútvegssýningunni um síðustu helgi. Merkið er markaðstæki fyrir íslenska framleiðendur sjávarafurða og viðbrögð við kröfum markaða um að sjávarafurðir komi úr fiskistofnum, sem nýttir eru á ábyrgan hátt.

 

 

Á fundi Úrskurðarnefndar sjómanna og útvegsmanna í dag, 8. október, var ákveðið að hækka verð á óslægðum þorski sem ráðstafað er til eigin vinnslu eða seldur er til skyldra aðila um 7% frá og með 8. október.

Bergur-Huginn ehf.  í  Vestmannaeyjum fékk verðlaun sem framúrskarandi íslensk útgerð þegar Íslensku sjávarútvegsverðlaunin 2008 voru afhent í Turninum í Kópavogi fyrir helgina.  Í flokki  framúrskarandi fiskvinnslu fékk Skinney-Þinganes hf. viðurkenningu.

Kristján Ragnarsson, fyrrum formaður og  framkvæmdastjóri LÍÚ, var í gær heiðraður fyrir framúrskarandi framlag sitt til íslensks sjávarútvegs. Verðlaunin hlaut hann í hófi þar sem Íslensku sjávarútvegsverðlaunin 2008 voru afhent.

Skoskir sjómenn neyðast til þess að að henda árlega fiski fyrir rúma 7 milljarða króna (40 milljónir punda). Þetta kom fram á ráðstefnu sem skosk stjórnvöld héldu í Edinborg í gær.  Allt að einni milljón tonna af fiski er hent í Norðursjónum árlega vegna ESB reglna.

Hópur norskra stórþingsmanna í Framfaraflokknum (Fremskrittspartiet) heimsótti skrifstofu LÍÚ í dag til þess að kynna sér helstu málefni íslensks sjávarútvegs og samskipti Norðmanna og Íslendinga á sviði sjávarútvegs.

Í fréttatíma Stöðvar 2 í gær, þann 22. september 2008, var viðtal við Gísla Gíslason talsmann MSC (Marine Stewardship Council) á Íslandi þar sem hann hélt því fram að íslenskur sjávarútvegur þurfi að óttast þá afstöðu sem mótuð hefur verið að undirgangast ekki vottun MSC.

Adolf Guðmundsson framkvæmdastjóri Gullbergs ehf á Seyðisfirði hefur tilkynnt að hann muni bjóða sig fram til formanns Landssambands íslenskra útvegsmanna á næsta aðalfundi samtakanna sem haldinn verður 30. og 31. október. Fyrir liggur að Björgólfur Jóhannsson mun ekki gefa kost á sér til endurkjörs.

Hér á síðunni vinstra megin má sjá nýjan tengil - Hvalamál - sem fjallar vítt og breytt um hvalamálefni. Þar má finna fjölda gagnlegra tengla um þennan málaflokk. Lesendur eru hvattir til þess að kynna sér það efni sem hér er í boði. 

Björgólfur Jóhannsson formaður LÍÚ afhendir Finnboga Bernódussyni safnverði peningagjöf til uppbyggingar sjóminjasafnsins Ósvarar við Bolungarvík. Við hlið þeirra stendur Eiríkur Tómasson varaformaður LÍÚ.

Svæðisbundin stjórnun hval- og selveiða á Norður-Atlantshafi framundan?

NAMMCO, Norður-Atlantshaf sjávarspendýraráðið, ákvað á ársfundi sínum á Grænlandi í byrjun september að leggja veiðar Grænlendinga á hnúfubak við Vestur-Grænland fari ekki yfir 10 dýr á árinu 2009. Þessi tillaga er byggð á niðurstöðum NAMMCO frá árinu 2006 þess efnis að slíkar veiðar væru vel innan marka sjálfbærni. Jafnframt var það tekið með í myndina að stofn hnúfubaka við Vestur-Grænland á árinu 2007 væri stærri en árið 2005.

Skoskar útgerðir fá 4,5 milljaðra króna (29 milljónir punda) til að byrja með í styrki. Þar af nemur olíustyrkurinn um 4,1 milljarði króna (26 milljónum punda).  Þetta segir í Fishing News International 15. ágúst sl. og kom fram í máli í skoska dreifbýlis- og umhverfisráðherrans Richards Lochhead.

Hvorki stofnar hrefnu né langreyðar eru í útrýmingarhættu og sjálfbærar veiðar í samræmi við tillögur Hafrannsóknastofnunarinnar munu ekki ganga um of á þessa stofna að mati vísindanefndar Alþjóða hvalveiðiráðsins. Ráðið sjálft hefur ennfremur úrskurðað að hvalveiðar Íslendinga séu fyllilega löglegar segir í ályktun aðalfundar útvegsmannafélagsins.

Höfum við efni á að láta detta niður ónotaðar 1.671 tonn af veiðiheimildum í þorski og 454 tonn af steinbít spyr Björn Jónsson sérfræðingur hjá LÍÚ í greinargerð sem hann hefur tekið saman.

Á fundi Úrskurðarnefndar sjómanna og útvegsmanna í dag þann 1. september var ákveðið að hækka verð á karfa um 7% og hækka verð á óslægðum þorski um 10% og óslægðri ýsu um 5% frá og með 1. september.

 Landssamband íslenskra útvegsmanna hefur um árabil bent á þá mismunun sem felst í byggðakvóta og línuívilnun.  Því miður höfum við ekki náð eyrum ráðamanna því frádráttur í þorski vegna línuívilnunar og byggðakvóta hefur aukist úr 0,56% á fiskveiðiárinu 1999/2000 í 4,66% á þessu og næsta fiskveiðiári og frádráttur í steinbít nemur 9,22% á næsta fiskveiðiári. 

Hér á landi er staddur sjávarútvegs-, veiðimála- og landbúnaðarráðherra Grænlands, Finn Karlsen í  boði Einars K. Guðfinnsonar sjávarútvegsráðherra.  Heimsóknin hófst formlega í gær, þriðjudaginn 12 ágúst. Ráðherrann heimsótti skrifstofu LÍÚ  í dag ásamt aðstoðarmanni sínum Hans Möller. 

Viðtal í Morgunblaðinu 12. ágúst við framkvæmdastjóra LÍÚ.

Í síðustu viku greindi Morgunblaðið frá því að þrjár stærstu stórmarkaðskeðjur Sviss hafi hætt að selja íslenskan villtan þorsk. Í viðtali við blaðið kom fram í máli  Friðriks J. Arngrímssonar  framkvæmdastjóra LÍÚ að málið snúist ekki aðeins um vottun sjálfbærra veiða, heldur sé tekist á um réttinn til að stýra fiskveiðum og nýta villta fiskistofna hvort lýðræðislega kjörin stjórnvöld geri það eða umhverfisverndarsamtök í gegnum kjörbúðir. Viðtal Mbl við Friðrik fer hér á eftir.

Eftir Svein Hjört Hjartarson hagfræðing

Í síðustu viku samþykkti ESB að auka styrki til sjávarútvegs í aðildarlöndum sambandsins og veita alls 2 milljörðum evra (248 milljörðum króna) til ársins 2010. Í hlutfalli af heildartekjum þeirra fimmtán fiskveiðiþjóða ESB sem hagstofa sambandsins EUROSTAT birtir upplýsingar um fyrir árið 2006 nema þessir styrkir 30% af árstekjum þeirra, en aflaverðmætið var 6,7 milljarðar (804 milljarðar króna).

Á fundi sínum í gær þann 15. júlí samþykkti ESB umfangsmikla framkvæmdaáætlun til ársins 2010 varðandi styrki til útgerða fiskiskipa í aðildarlöndum sínum. Alls nema þessir styrkir um 2 milljörðum evra eða 248 milljörðum íslenskra króna.

Samkvæmt Bloomberg fréttaveitunni í dag er verð á olíutunninni í 145 dollurum í framvirkum viðskiptum. Það segir okkur miðað við gengi á dollara í dag og að í hverri tunnu séu 159 lítrar af olíu að verð á hráolíu er nú um 70,00 íkr/lítra til olíuhreinsunarstöðva.

ESB leggur til að borgað verði fyrir að binda fiskiskip aðildarlandanna í höfn á meðan unnið er að tillögum um hvernig hjálpa megi útgerðum til þess að lifa af hið gríðarlega háa olíuverð.

Eftir Friðrik J Arngrímsson framkvæmdastjóra LÍÚ

Ákvörðun aflamarks er eitt mikilvægasta verkefni sjávarútvegsins. Samkvæmt lögum um stjórn fiskveiða er það sjávarútvegsráðherra sem ákveður aflamark einstakra fisktegunda að fengnum tillögum Hafrannsóknastofnunarinnar. 

Ákvörðun um leyfilegan hámarksafla fiskveiðiárið 2008/2009

Friðrik J. Arngrímsson, framkvæmdastjóri LÍÚ, segir að ekki hefði verið tekin nein áhætta með því að leyfa 150-160 þúsund tonna þorskveiði á næsta fiskveiðiári, en þorksafli verður þá 130.000 tonn samkvæmt ákvörðun sjávarútvegs- og landbúnaðarráðherra um leyfilegan heildarafla á næsta fiskveiðiári, 2008-2009, sem kynnt var í gær.  Hann telur aftur á móti að of langt hafi verið gengið við ákvörðun á ýsukvóta, en erfitt geti orðið að láta veiðar ganga upp með svo lítinn þorskafla á móti tiltölulega háum afla í ýsu og öðrum tegundum

 

Þegar sjávarútvegsráðherrar ESB landanna hittast í Luxemborg í næstu viku mun olíuverðskrísan verða  helsta umræðuefnið á dagskrá fundarins. Mörg aðildarlönd ESB hafa óskað eftir því að  viðbrögð við háu olíuverði og slæm áhrif þess á afkomu fiskveiða verði rædd. ESB hefur unnið fjölda tillagna um hvernig bregðast megi við ört hækkandi olíuverði og lækka tilkostnað við fiskveiðar í  aðildarlöndunum.

Alþjóðleg ráðstefna á Akureyri 12. júní 2008

Þann 12. júní sl. var  haldin athyglisverð aþjóðleg ráðstefna á vegum Háskólans á Akureyri  sem bar yfirskriftina Framtíð sjávarútvegsins. Ráðstefnan var haldin á Hótel KEA og í Borgum, glæsilegum húsakynnum háskólans. Meðal fyrirlesara voru bæði innlendir og erlendir fræðimenn og atvinnurekendur sem teljast margir hverjir fremstir á sínu sviði og fjölluðu þeir um það sem efst er á baugi á þeirra sviði í sjávarútveginum. 

Á fundi Úrskurðarnefndar sjómanna og útvegsmanna  11. júní var ákveðið að lækka verð á óslægðum þorski sem ráðstafað er til eigin vinnslu eða seldur er til skyldra aðila um 5% frá og með 11. júní

Hjörtur Gíslason, formaður Útvegsmannafélags Reykjavíkur.                               Ræða flutt á sjómannadegi í Reykjavík 2008. 

Þjóð sem er jafn háð veiðum og við Íslendingar verður að standa vörð um sjálfbæra nýtingu fiskistofnanna. Við gerum kröfu til þeirra sem ætla að stjórna landinu að þeir standi vörð um megin kjarnann í nýtingarstefnu þjóðarinnar, sem er sjálfbær nýting náttúruauðlinda.

Á fundi Úrskurðarnefndar sjómanna og útvegsmanna þann 2. júní var ákveðið að lækka verð á slægðum þorski sem ráðstafað er til eigin vinnslu eða seldur er til skyldra aðila um - 8%, slægðri og óslægðri ýsu um - 4% og lækka verð á karfa um - 5% frá og með 1. júní.

Megin þorri aflamarks frá 1984 hefur skipt um hendur.

Landssamband íslenskra útvegsmanna hefur kannað hversu stór hluti veiðiheimilda í tegundum sem voru kvótasettar 1984 hefur skipt um hendur við kaup á aflaheimildum og fyrirtækjum sem eiga aflaheimildir og vegna aðgerða stjórnvalda sem hafa aukið veiðirétt minni skipa. Niðurstaðan er sú að um 87,5% aflaheimildanna hefur skipt um hendur, en einungis 12,5% þeirra veiðiheimilda sem skipt var á milli fyrirtækja og einstaklinga í aflamarkskerfinu 1984 eru enn í eigu sömu aðila.

Látlaus andróður alþjóðlegra umhverfissamtaka

Eftir Dr.Kristján Þórarinsson, stofnvistfræðing LÍÚ.

,,Nokkrir aðilar á vegum umhverfissamtaka bjóða vottun sjálfbærra veiða og umhverfismerki. Þeir leitast við að taka sér stöðu sem hliðverðir inn í matvælaverslanir, vilja ná einokunaraðstöðu en hafa lítinn skilning á viðfangsefninu

Hagsmunaaðilar í sjávarútvegi fagna þeirri ákvörðun sjávarútvegsráðherra að hefja skuli hrefnuveiðar. Sú ákvörðun er í samræmi við stefnu stjórnvalda um sjálfbæra nýtingu lifandi auðlinda hafsins og ályktun Alþingis um hvalveiðar frá 10. mars 1999.

Fundur um lagningu og öryggi sæstrengja

Náið samstarf og samráð sjávarútvegs-og fjarskiptafyrirtækja þar sem tekið er tillit til ólíkra hagsmuna er grundvallaratriði við lagningu sæstrengja. Bætt fjarskipti eru mikilvæg fyrir sjávarútveginn og samfélagið allt, en einnig er mikilvægt að forðast að sæstrengir séu lagðir um verðmæta fiskislóð. Þetta kom m.a. fram í erindi Dr. Kristjáns Þórarinssonar, stofnvisfræðings LÍÚ, sem hann flutti á aðalfundi ICPC  (International Cable Protection Committee) nýlega, en félagar í þeim samtökum eru fjarskiptafyrirtæki víða að úr heiminum (þ.á.m. Síminn og Farice), framleiðendur sæstrengja og þjónustuaðilar. Yfirskrift fundarins var "Sharing the seabed in harmony with others" sem í íslenskri þýðingu gæti verið Að deila hafsbotninum í sátt við aðra".  

Sameinaður skóli fær nýtt nafn

Tækniskóli Íslands skóli atvinnulífsins, er nafn hins nýja skóla sem verður til með sameiningu Fjöltækniskóla Íslands og Iðnskólans í Reykjavík.  Menntamálaráðherra afhjúpaði nafn og merki skólans með aðstoð skólameistaranna, Jóns B. Stefánssonar og Baldurs Gíslasonar, í gær á sýningunni Verk og vit sem fram fer nú í Laugardalshöll.

Landssamband íslenskra útvegsmanna auglýsir styrk til framhaldsnáms  í fiskifræði, sjávarvistfræði, sjávarlíffræði, fiskalífeðlisfræði, haffræði, veiðarfærafræði og skyldum greinum.  Styrkurinn er ætlaður þeim sem hafa lokið eða eru að ljúka háskólanámi og hyggjast stunda framhaldsnám erlendis á næsta skólaári.  Styrkupphæð er kr. 700.000,-.

Ákvörðun um fiskverð

Á fundi í úrskurðarnefnd sjómanna og útvegsmanna sem haldinn var í dag var ákveðið að hækka verð á slægðri og óslægðri ýsu um 10%. Þessi ákvörðun gildir frá og með 1.apríl.

Útflutningur á ísvörðum fiski í gámum.

Á fundi stjórnar LÍÚ föstudaginn 7. mars var samþykkt að skora á félagsmenn að nýta sér kosti Fjölnetsins sem er uppboðskerfi rekið af Reiknistofu fiskmarkaða.  Með því geta innlendir aðilar með enn auðveldari hætti boðið í fisk sem senda á ísvarinn í gámum á erlenda fiskmarkaði og selja þar. 

Hvernig er hægt að auka öryggi sjómanna og fækka slysum, var meginviðfangsefni fundar sem haldinn var s.l. fimmtudag 6. mars. Fundinn sóttu auk fulltrúa útgerðarmanna og sjómanna, aðilar frá samgönguráðuneyti, tryggingafélögum, Rannsóknarnefnd sjóslysa, Siglingamálastofnun, Slysavarnarskóla sjómanna, Fjöltækniskóla Íslands, Slysavarnarfélaginu Landsbjörgu og Heilsuverndarstöðinni.

Til verður stærsti framhaldsskóli landsins

Samningur um sameiningu Fjöltækniskóla Íslands og Iðnskólans í Reykjavík var undirritaður í dag. Samkvæmt samningnum mun Menntafélagið ehf. annast rekstur nýs skóla sem verður stærsti framhaldsskóla landsins og lang stærsti starfsmenntaskólinn á framhaldsskólastigi með um 2000 nemendur í reglulegu námi og ef nemendur í kvöldskóla, fjarnámi og á námskeiðum eru taldir með eru þeir vel yfir 3000. Námsbrautir í skólanum verða um 40 talsins. Menntafélagið ehf. er í eigu Samtaka iðnaðarins, Landssambands íslenskra útvegsmanna, Samorku, Sambands íslenskra kaupskipaútgerða og Iðnaðarmannafélagsins í Reykjavík. Samningurinn er til fimm ára og gildir frá 1. júlí 2008. Viðræður um sameiningu skólanna hafa staðið í á annað ár.

Á fundi Úrskurðarnefndar sjómanna og útvegsmanna þann 29. febrúar var ákveðið að hækka verð á slægðum og óslægðum þorski sem ráðstafað er til eigin vinnslu eða seldur er til skyldra aðila um 5%. Verð á karfa lækkar um 5%  en verð á slægðri og óslægðri ýsu er óbreytt.  Breytingar þessar taka gildi frá og með 1. mars. n.k.   

Japönsk stjórnvöld íhuga að taka upp aflamarkskerfi með framseljanlegum aflaheimildum. Þetta kom fram á fundi sem fulltrúar LÍÚ áttu með Dr. Masayuki Komatsu en hann á sæti í svokallaðri Takagi nefnd um umbætur á stjórnun veiða við Japan, en miklir erfiðleikar steðja þar að sjávarútvegi um þessar mundir. 

Á fundi Úrskurðarnefndar sjómanna og útvegsmanna þann 31. janúar var ákveðið að hækka verð á þorski sem ráðstafað er til eigin vinnslu eða seldur er til skyldra aðila um 8% og ýsu um 7% frá og með 1. febrúar n.k  Viðmiðunarverð á karfa er óbreytt.

 

Hafrannsóknastofnunin svarar bréfi LÍÚ um nýtingu loðnustofnsins og áhrif veiða.

Aðalfundur LÍÚ 2005 ályktaði um mikilvægi rannsókna á loðnu og beindi því til sjávarútvegsráðherra og Hafrannsóknastofnunarinnar að loðnurannsóknir yrðu auknar til muna, en loðnan gegnir afar mikilvægu hlutverki í vistkerfi sjávar við Ísland. 

Menntun og atvinnulíf var yfirskrift ráðstefnu sem haldin var í Fjöltækniskóla Íslands í gær 8. janúar.  Markmið ráðstefnunnar var að efla umræðuna á milli þeirra er starfa innan skólakerfisins og aðila atvinnulífsins.

Útgerðarmenn í Vestmannaeyjum hafa verið kjörnir Eyjamaður ársins 2007 af vikublaðinu Fréttum, en blaðið veitir árlega verðlaun, svokallaðan Fréttapíramída, til að vekja athygli á þeim einstaklingum, fyrirtækjum og félögum sem skara framúr vegna elju og dugnaðar. Að þessu sinni þótti við hæfi að velja hóp manna í stað þess að velja einstakling, en á árinu voru útvegsmenn duglegir við að endurnýja skipakost sinn og komu sex ný skip til Vestmannaeyja, Guðmundur, Vestmannaey, Bergey, Gullberg, Álsey og loks Dala Rafn. Þá eru a.m.k. þrjú skip í smíðum fyrir Eyjamenn.

Núverandi og fyrrverandi útgerðarmenn í Vestmannaeyjum, í samvinnu við kvennfélagið Líkn, afhentu Sjúkrahúsi Vestmannaeyja nýlega sjúkrarúm og tæki að andvirði 38 milljóna króna.