Fréttir

Vélstjórafélag Íslands, Landssamband íslenskra útvegsmanna og Samtök atvinnulífsins gerðu í dag nýjan kjarasamning um kjör vélstjóra á fiskiskipum. Kjarasamningurinn kemur í stað samnings aðilanna frá 2001 sem rennur út þann 31. desember 2005. Gildistími er til 31. maí 2008.

Fjöltækniskóli Íslands útskrifaði sína fyrstu nemendur undir nýju nafni skólans og sameinuðum skóla 20. desember 2005, en sl. vor var Vélskóla Íslands og Stýrimannaskólanum í Reykjavík formlega slitið í síðasta sinn. Nemendur Fjöltækniskólans útskrifuðust með skipstjórnarpróf og vélstjórnarpróf og vélstjórar einnig með stúdentspróf. Nemendur sem luku námi frá Fjöltækniskólanum að þessu sinni voru 14, þar af 5 á vélstjórnarsviði og 9 á skipstjórnarsviði.

Úrskurðarnefnd sjómanna og útvegsmanna ákvað á fundi sínum þann 21. desember 2005 að hækka viðmiðunarverð á karfa um 7%.

Samningur strandríkjanna um stjórn veiða úr kolmunnastofninum var undirritaður í Osló í dag og lýkur þar með stjórnlausum veiðum úr stofninum sem staðið hafa yfir undanfarin ár. Að samkomulaginu standa auk Íslands, Evrópusambandið, Noregur og Færeyjar. Samningurinn byggir á samkomulagi hagsmunaaðila landanna; Landssambands íslenskra útvegsmanna, Samtaka norskra fiskiskipaeigenda og Northern Pelagic Working Group (ESB), sem náðist í september á þessu ári.

Norðmenn og framkvæmdastjórn Evrópusambandsins hafa komist að tvíhliða samkomulagi um veiðar þjóðanna úr norskíslenska síldarstofninum á næsta ári. Samkvæmt samkomulaginu munu Norðmenn veiða 564.200 tonn af norsk-íslenskri síld 2006 og skip aðildaríkja ESB 62.000 tonn. Þá fá ESB skip að veiða síld í norskri lögsögu og einnig verður banni við löndun þeirra á síld í Noregi aflétt.

Alþingi hefur samþykkt breytingar á lögum um úrvinnslugjald sem fela í sér að frá áramótum verður lagt úrvinnslugjald á allar umbúðir úr pappa, pappír og plasti sem fara á markað. Innflytjendur verða því að gefa upp magn flutnings- og söluumbúða utan um vöru sem flutt er til landsins. Jafnframt verða innlendir umbúðaframleiðendur að gefa upp magn seldra umbúða. Álagning úrvinnslugjalds á pappa, pappír og plast er liður í að uppfylla skyldur sem Íslendingar hafa gengist undir með þátttöku í Evrópska efnahagssvæðinu og felast í að ná ákveðnum árangri í endurvinnslu. Álagningin er í samræmi við mengunarbótaregluna, þ.e. að sá sem mengar ber kostnaðinn af menguninni. Úrvinnslugjald á að virka sem hvati til að minnka umbúðanotkun.

Vísbendingar eru um að þorskárgangurinn 2005 sé lélegur, að því er fram kemur í tilkynningu Hafrannsóknastofnunarinnar sem birti í dag fyrstu niðurstöður úr stofnmælingu botnfiska að haustlagi. Rannsóknasvæðið miðast við landgrunn Íslands allt niður á 1500 m dýpi. Samkvæmt niðurstöðum stofnunarinnar fannst lítið æti í þorskmögum og lítið af loðnu en þó meira en í fyrra. Hlutur síldar og kolmunna í æti þorsks hefur aukist undanfarin ár.

Landssamband íslenskra útvegsmanna, Samtök atvinnulífsins og Vélstjórafélag Íslands gerðu í dag með sér samkomulag um breytingar á kjarasamningum aðilanna. Samkvæmt samkomulaginu greiðist sérstök eingreiðsla, kr. 26.000, til vélstjóra sem hafa verið í fullu starfi allt árið hjá sömu útgerð og eru í starfi síðustu viku í nóvember eða fyrstu viku desember. Vélstjórar sem ekki ná fullu starfsári fá greitt hlufallslega.

Undanfarið hafa birst í fjölmiðlum fréttir af áhyggjum manna um að fjöldi útlendinga á íslenskum fiskiskipum fari vaxandi. Birti Morgunblaðið fyrir skemmstu frétt um málið á forsíðu og tók það einnig upp í leiðara blaðsins. Í þeim fréttum sem fluttar hafa verið af þessu máli hefur hvergi verið leitast við að kanna fjölda erlendra sjómanna á íslenskum fiskiskipum.

Landssamband íslenskra útvegsmanna, Samtök atvinnulífsins, Farmanna- og fiskimannasamband Íslands, Sjómannasamband Íslands og Alþýðusamband Vestfjarða gerðu í dag með sér samkomulag um breytingar á kjarasamningum aðilanna með vísan til endurskoðunarákvæða þeirra. Samkvæmt samkomulaginu greiðist sérstök eingreiðsla kr. 26.000 til sjómanna sem hafa verið í fullu starfi allt árið hjá sömu útgerð og eru í starfi síðustu viku í nóvember eða fyrstu viku desember. Sjómenn sem ekki ná fullu starfsári fá greitt hlufallslega

Fiskiskip ríkja Evrópusambandsins sem hafa leyfi til að veiða 3.000 tonn af karfa á afmörkuðum svæðum í íslenskri fiskveiðilögsögu á þessu ári, hafa veitt verulegt magn af öðrum tegundum, einkum þorski og ufsa. Skipin hafa veitt 1.150 tonn af karfa það sem af er þessu ári, en samanlagður afli þeirra í þorski og ufsa er tæp 650 tonn sem er tæplega 40% heildaraflans, sem er um 1.900 tonn. Þar af er þorskaflinn 314 tonn og ufsaaflinn 334 tonn.

AVS rannsóknasjóður í sjávarútvegi veitti 217 milljónum króna á þessu ári í styrki til 64 verkefna, en alls var sótt um styrk til sjóðsins vegna 112 verkefna í ár. Alls hefur verið úthlutað 405 milljónum króna í styrki á þeim þremur árum sem sjóðurinn hefur verið starfræktur. Þetta kom fram á blaðamannafundi Einars K. Guðfinnssonar sjávarútvegsráðherra í dag, en fundurinn var haldinn í húsakynnum HB Granda í Reykjavík.

Sjávarútvegsráðherra hefur lagt fram á Alþingi frumvarp til laga um breytingar á lögum um stjórn fiskveiða. Frumvarpið felur í sér að rétti til úthlutunar úr svokölluðum 3.000 tonna potti, sem kveðið er á um í 9. gr. a, verður breytt þannig að þeir sem eiga þennan rétt fái úthlutað aflahlutdeild eins og lýst er í frumvarpinu.

Fulltrúar borgarstjórnarflokks sjálfstæðismanna í Reykjavík heimsóttu útvegsmenn í Reykjavík í dag og kynntu sér starfsemi nokkurra útgerðarfyrirtækja í borginni. Við það tækifæri kom m.a. fram hjá Vilhjálmi Þ. Vilhjálmssyni, leiðtoga borgarstjórnarflokksins, að sjálfstæðismenn væru tilbúnir til að endurskoða fyrirhugaðan flutning slippsins frá Reykjavík.

Hafrannsóknastofnunin mun á næstu dögum halda opna kynningar- og umræðufundi víða um land, en umræðuefnið er haf- og fiskirannsóknir og ráðgjöf stofnunarinnar.

Samkomulag um stjórn veiða úr kolmunnastofninum náðist í strandríkjaviðræðum Íslands, Færeyja, Noregs og Evrópusambandsins í Kaupmannahöfn í gær. Koma 17,63% leyfilegs heildarafla í hlut Íslands, Evrópusambandið fær 30,5%, Færeyjar 26,125% og Noregur 25,745%. Friðrik J. Arngrímsson framkvæmdastjóri LÍÚ segir að um tímamótasamning sé að ræða.

Formaður LÍÚ, Björgólfur Jóhannsson, greindi frá því á aðalfundi LÍÚ að stjórn samtakanna hefði ákveðið að styrkja Slysavarnarfélagið Landsbjörgu um 15 milljónir króna og var styrktarsamningur þessa efnis undirritaður á aðalfundinum.

Hægt er að nálgast þær ræður og erindi sem flutt voru á aðalfundi LÍÚ hér á síðunni. Farið er í vinstri spalta á síðunni og veljið "Aðalfundir". Veljið síðan "Aðalfundur 2005".

Íslendingar eru í óþolandi stöðu í gengismálum, með of sterka krónu og of háa vexti sem erlendir aðilar nýta sér og styrkja krónuna enn meira. Nauðsynlegt er að komast sem fyrst úr þessari stöðu. Stöðugleiki í gengismálum er ekki síður mikilvægur en lág verðbólga til að tryggja jafnvægi í efnahagslífinu.
Þetta kom m.a. fram í ræðu sem Sigurjón Þ. Árnason bankastjóri Landsbankans flutti á aðalfundi LÍÚ í gær, þar sem sterk staða krónunnar umræðuefnið.

Aflaheimildir eru eign í skilningi eignarréttarákvæðis 72. gr. stjórnarskrárinnar, enda óumdeilt meðal fræðimanna að þær beri öll megineinkenni eignarréttinda. Þetta er meginniðurstaða dr. juris Guðrúnar Gauksdóttur, dósents við Háskólann í Reykjavík og formanns Rannsóknastofnunar í auðlindarétti, í erindi sem hún flutti á aðalfundi LÍÚ.

Mikilvægt er að sátt náist um sjávarútvegsmálin og vill Samfylkingin leggja sitt af mörkum til þess að svo geti orðið. Til þess að slík sátt náist verði menn að ræða saman og allir að gefa eitthvað eftir af sínum ýtrustu kröfum og skoðunum. Deila um greiðslu fyrir afnotarétt af auðlindinni verði ekki leystar nema í tengslum við greiðslur fyrir afnot annarra auðlinda sem skilgreindar eru sem þjóðareign, ríkiseign eða í þjóðarumsjá. Þetta kom fram í ræðu sem Ingibjörg Sólrún Gísladóttir, formaður Samfylkingarinnar flutti á aðalfundi LÍÚ í dag.

Mikilvægt er að ákvörðun verði tekin nú þegar um aukin kaup á gjaldeyri og söluandvirði Símans nýtt til þess m.a. Einnig er brýnt að breyta  strax reglum Íbúðalánasjóðs varðandi vexti og lánshlutföll. Slíkar aðgerðir munu draga úr þenslu. Þetta kemur fram í efnahagsályktun 66. aðalfundar LÍÚ sem lauk í dag. Aðalfundurinn útvegsmanna samþykkti einnig ályktanir um greiðslumiðlun innan sjávarútvegsins, ályktun um hvalveiðar, ályktun um loðnurannsóknir, ályktun um eftirlit vegna skipaskoðunar og ályktun um ráðgefandi stjórn Fiskistofu.
Ályktanir fundarins fara hér á eftir. 

Björgólfur Jóhannsson var endurkjörinn formaður LÍÚ aðalfundinum sem lauk í dag. Þá voru fimm menn kjörnir í stjórnina til næstu þriggja ára.

"Ég tel mikilvægt að viðurkenna þá staðreynd að undirliggjandi verðbólga stafar að mestu leyti af heimatilbúnum ástæðum. Þetta er einfaldlega staðreynd. Seðlabankinn mun ekki ná verðbólgumarkmiðum í tæka tíð með hækkun stýrivaxta. Hin svokölluðu ruðningsáhrif verða alltof dýrkeypt. Ruðningsáhrif þýðir á mannamáli að fyrirtæki heltast úr lestinni, fólk missir vinnuna og samfélagið allt tapar þegar upp er staðið. Undirliggjandi verðubólgu verður einfaldlega að tappa af," sagði Björgólfur Jóhannsson, formaður LÍÚ í ræðu sinni við upphaf aðalfundar semtakanna sem hófst í dag.

Aðalbjörg sf. hlaut umhverfisverðlaun  LÍÚ árið 2005, en þau voru veitt á aðalfundi samtakanna í dag. Sjávarútvegsráðherra, Einar K. Guðfinnsson, afhenti Aðalbjargarbræðrum, þeim Sigurði, Guðbjarti og Stefáni Einarssonum, verðlaunin í dag.
 

Dreifing veiðiréttarins í sjávarútvegi er miklu meiri heldur en svarar dreifingu eignaraðildar í langflestum stóru atvinnuvegunum okkar. Og það er furðulegt að menn halda áfram að tala um samþjöppun í sjávarútvegi og vá af henni en ljá því ekki máls að setja skorður við eignarhaldi einokunar og fákeppnisfyrirtækja á viðkvæmasta sviði lýðræðis okkar, fjölmiðlamarkaðnum, þar sem þó er eitt skýrasta dæmið um samþjappað eignarhald. Sjávarútvegur er einmitt eitt gleggsta dæmið í íslensku atvinnulífi um tiltölulega dreift eignarhald. Eða hvað ætli yrði sagt um okkar ágætu atvinnugrein ef einstök fyrirtæki réðu 50 til 60 prósent aflaheimilda, eða skiptu kvótanum í tvennt eða þrennt. Viðlíka aðstæður eru til staðar í ýmsum öðrum atvinnugreinum hér á landi, sagði Einar K. Guðfinnsson, sjávarútvegsráðherra á aðalfundi LÍÚ í dag.. Ræða ráðherra fer í heild hér á eftir.

Aðalfundur Landssambands íslenskra útvegsmanna verður haldinn dagana 27. og 28. október nk. á Grand Hótel í Reykjavík.

Dagskrá fundarins fer hér á eftir.

Aðalfundur Landssambands íslenskra útvegsmanna verður haldinn dagana 27. og 28. október nk. Fundurinn verður á Grand hótel í Reykjavík og hefst kl. 13:00 fimmtudaginn 27. október.

Landssamband íslenskra útvegsmanna hefur veitt Hlyni Ármannssyni líffræðingi styrk að upphæð kr. 500.000,- til framhaldsnáms í fiskifræði.

Gefin verða út leyfi til að veiða allt að 39 hrefnur í hvalarannsóknaáætlun Hafrannsóknastofnunarinnar á þessu ári, en áætlunin gerir ráð fyrir veiðum á 200 hrefnum, 200 langreyðum og 100 sandreyðum. Ekki verður farið í veiðar á langreyði og sandreyði að þessu sinni, að því fram kemur í tilkynningu frá sjávarútvegsráðuneytinu.

Sjávarútvegsráðherra gaf í dag út reglugerð um leyfilegan heildarafla á fiskveiðiárinu 2005/2006 sem hefst 1. september nk sem verður að mestu í samræmi við ráðgjöf Hafrannsóknastofnunarinnar. Þannig verður heildarafli í þorski 198 þúsund tonn, í ýsu 105 þúsund tonn,  í ufsa 80 þúsund tonn, í karfa 57 þúsund tonn, í grálúðu 15 þúsund tonn, í steinbít 13 þúsund tonn, í keilu 3.500 tonn, í íslenskri sumargotssíld 110 þúsund tonn, í úthafsrækju 10 þúsund tonn og 300 tonn í Arnarfjarðarrækju.

Norðmenn hafa gefið út reglugerð um síldveiðar á hafsvæðinu við Svalbarða. Í reglugerðinni er kveðið á um að sameiginlegur hámarksafli fiskiskipa frá Íslandi, Evrópusambandinu, Færeyjum og annarra sem leyfi hafa til veiða á svæðinu sé 90.000 tonn. Er heimilt að stunda síldveiðar á svæðinu á tímabilinu 4. júní til 15. október á þessu ári. Norðmenn gáfu út sambærilega reglugerð í fyrra þar sem hámarksafli á svæðinu var ákveðinn 80.000 tonn.

Samkvæmt skýrslu Hafrannsóknastofnunar um ástand nytjastofna sjávar sem kynnt var í dag, munu veiðiheimildir í þorski minnka um 7.000 tonn á næsta fiskveiðiári verði farið að aflareglu. Þá gerir stofnunin tillögu um aukningu leyfilegs hámarksafla í ýsu og ufsa.

Friðrik J. Arngrímsson framkvæmdastjóri Landssambands íslenskra útvegsmanna hvetur til þess að stóðiðju- og virkjanaframkvæmdir verði skipulagðar þannig að áhrif þeirra verði ekki slík sem nú má sjá í þjóðfélaginu. Hann segir til lítils að fjölga álverum verði það til þess að meiri verðmæti tapist í í sjávarútvegi, ferðaþjónustu og iðnaði og efnahags- og atvinnulífið standi veikara á eftir. Nauðsynlegt sé að stjórnvöld beiti aðhaldi í fjármálunum á framkvæmdatímum. Ekki gangi að Seðlabankinn hafi aðeins möguleika á vaxtabreytingum til að hamla gegn verðbólgu sem síðan leiðir til mikillar styrkingar íslensku krónunnar með tilheyrandi neikvæðum áhrifum fyrir útflutningsatvinnuvegina. Þetta kom m.a. fram í viðtali sem Morgunblaðið átti við Friðrik nýlega, en viðtalið birtist í heild hér á eftir.

Stýrimannaskólanum í Reykjavík og Vélskóla Íslands var formlega slitið í síðasta sinn sem sjálfstæðum skólum 20. og 21. maí  sl.. Framvegis munu útskriftir fara fram sameiginlega undir nafni Fjöltækniskóla Íslands. Sextán nemendur luku námi frá Stýrimannaskólanum á þessu skólaári, þar af tveir af 2. stigi og fjórtán af 3. stigi. Frá Vélskóla Íslands luku 34 nemendur námi á þessu ári, þar af fimm af 2. stigi og 29 af 4. stigi. Nemendur Vélskólans útskrifuðust með stúdentspróf samfara Vélstjórnarprófi 4. stigs.

Stærsta fiskiskip íslenska fiskiskipaflotans, Engey RE 1, kom til heimahafnar í Reykjavík í gær. Skipið var smíðað á Spáni árið 1994, en HB Grandi hf. keypti skipið á síðasta ári.

Skrifað var undir nýjan kjarasamning Landssambands íslenskra útvegsmanna og Samtaka atvinnulífsins við Vélstjórafélag Íslands í dag.

Á vefnum skip.is gerir Magnús Þór Hafsteinsson athugasemd við ábendingu okkar hér á vefnum þar sem glannalegar ályktanir um aflamarkskerfið út frá stofnvísitölu þorsks úr nýafstöðnu togararalli voru gagnrýndar. Í því samhengi var bent á uppgang ýsunnar undanfarið, en ýsuveiðum er einnig stjórnað í hinu sama aflamarkskerfi. Ljóst er að það er hvorki aflamarkskerfinu að kenna að síðustu seiðaárgangar þorsksins eru lélegir, né heldur er það því að þakka að ýsustofninn er á uppleið. Fiskveiðistjórnunarkerfi búa nefnilega ekki til fisk.

Mikil umræða hefur átt sér stað í kjölfar fréttatilkynningar Hafrannsóknastofnunarinnar um fyrstu niðurstöður togararalls nú nýverið og hafa sumir þátttakendur verið all glannalegir í ályktunum sínum.

Reynslan hefur sýnt að ekki er ráðlegt að draga miklar ályktanir af nýjustu stofnvísitölu þorsks úr togararalli, bæði hvað varðar breytingar í stofnstærðarmati og væntanlegan hámarksafla næsta fiskveiðiárs, segir Kristján Þórarinsson, stofnvistfræðingur LÍÚ. Einungis er um að ræða bráðabirgðaniðurstöðu, eins konar samlagningu aflans án þess að aldursgreining fiskanna liggi fyrir, segir Kristján.

Landssamband íslenskra útvegsmanna óskar landsmönnum gleðilegs sumars.

Stofnvísitala þorsks lækkaði um 16% frá mælingu Hafrannsóknarstofnunarinnar í fyrra 2004 en stofnvísitala ýsu hækkaði um 20%. Þá var stofnvísitala gullkarfa mun lægri en árin 2003 og 2004, en vísitalan var óvenju há þau ár. Vísitala steinbíts var óbreytt frá fyrra ári þegar hún var með lægsta móti, ufsa svipuð og árið áður, en vísitala skarkola lækkaði. Þetta eru helstu niðurstöður stofnmælingar botnfiska á Íslandsmiðum í ár, svonefndu togararalli.

Sjávarútvegsráðherra hefur ákveðið að íslenskum skipum verði heimilt að veiða 157.700 lestir af norsk-íslenskri síld á þessu ári.

Umhverfismerkingar fiskafurða  á faglegum forsendum eru jákvæðar fyrir sjávarútveginn og geta stuðlað að öflugri upplýsingagjöf. Alþjóðlegar reglur stuðla að samræmi í kröfum og koma í veg fyrir misbeitingu og ringulreið á markaði. Reglur stuðla einnig að jákvæðri ímyndarsköpun, því að þeir sem ekki fylgja reglum skaða ímynd sína á markaði. Þetta kom m.a. fram í ræðu dr. Kristjáns Þórarinssonar, stofnvistfræðings LÍÚ á Fiskiþingi sem haldið var sl. föstudag, en þar ræddi hann um umhverfismerkingar sjávarafurða.

Veiðiheimildir íslenskra skipa í úthafskarfa minnka verulega í ár miðað við heimilildir síðasta árs og verða 34.470 lestir í ár, samanborið við 55.000 lestir í fyrra. Alls er heimilt að veiða 28.200 lestir á svæði sem er að hluta til innan íslensku lögsögunnar, en 6.270 lestir á svæði utan lögsögunnar. Sjávarútvegsráðherra gaf út reglugerð þessa efnis í dag.

Landssamband íslenskra útvegsmanna auglýsir styrk til framhaldsnáms í fiskifræði, sjávarvistfræði eða sjávarlíffræði.  Styrkurinn er ætlaður náttúrufræðingum sem hafa lokið eða eru að ljúka grunnnámi í háskóla (B.S. prófi) og hyggjast hefja framhaldsnám erlendis á næsta skólaári.  Styrkupphæð er kr. 500.000,-.

Sjálfbærir fiskistofnar og ábyrg fiskveiðistjórnun eins og Íslendingar stunda eru þau atriði sem tveir erlendir fyrirlesarar lögðu mikla áherslu á í ræðum sínum á ráðstefnu sjávarútvegsráðuneytisins, Fiskurinn og framtríðin, sem haldin var í Reykjavík föstudaginn 4. mars sl. Þetta voru þeir Quentin Clark, innkaupastjóri bresku stórmarkaðskeðjunnar Waitrose og Johann Lindenberg stjórnarformaður Unilever í Þýskalandi, en Unilever er eitt stærsta fyrirtæki heims.

Fundur Fiskimálanefndar Matvæla- og landbúnaðarstofnunar Sameinuðu þjóðanna (FAO),  samþykkti í dag leiðbeinandi reglur um umhverfismerkingar sjávarafurða. Þar með er mikilvægum áfanga náð eftir nær áratugar starf að þessum málum innan FAO, segir í frétt frá sjávarútvegsráðuneytinu í dag.

Ríkisstjórnin samþykkti á fundi sínum í morgun tillögu sjávarútvegsráðherra þess efnis að fjárveiting til loðnurannsókna verði aukin um 3 milljónir króna, en það fé verður m.a. nýtt til rannsókna á loðnugöngu sem fundist hefur undan Vestfjörðum.

Nauðsynlegt er að stjórnvöld auki kvóta íslenskra skipa í norsk íslenska síldarstofninum í samræmi við þá kvótaaukningu sem Norðmenn hafa einhliða tekið sér.

"Á einu ári er tekjuskerðing sjávarútvegsins miðað við gengið í dag og það sem telja má jafnvægisgengi um 25 milljarðar króna. Í stað þess að íslensk sjávarútvegsfyrirtæki og starfsfólk þeirra ættu að vera að upplifa einhverja bestu tíma í sögunni blasir við mikill samdráttur og erfiðleikar með tilheyrandi áhrifum á þjónustuaðila og sveitarfélög víða um land," segir Friðrik J. Arngrímsson, framkvæmdastjóri LÍÚ m.a. í grein sem birtist í nýjasta tölublaði Fiskifrétta, en greinin ber yfirskriftina "Standast stjórnvöld þolraunina?"

Fjöltækniskóli Íslands kynnir almenningi starfsemi sína á morgun, laugardag, en Fjöltækniskólinn er nýr skóli sem varð til við sameiningu Stýrimannaskólans og Vélskólans og er til húsa í Sjómannaskólahúsinu við Háteigsveg. Skólinn verður opinn frá kl. 13:00 til 16:30.

Fjöltækniskóli Íslands er nýr einkarekinn skóli sem byggður er á traustum grunni Stýrimannaskólans í Reykjavík og Vélskóla Íslands. Markmið skólans er að bjóða fjölþætta og öfluga menntun sem gefur verðmæt starfsréttindi samhliða stúdentsprófi. Fjögur námssvið verða við skólann, en það eru Tæknisvið, Vélstjórnarsvið, Skipstjórnarsvið og  Sjávarútvegssvið. Nú fer fram kennsla á skipstjórnar- og vélstjórnarsviði, en næsta haust hefst kennsla á tveimur nýjum sviðum, tæknisviði og sjávarútvegssviði.

Á fyrstu ellefu mánuðum ársins 2004 var aflaverðmæti íslenskra skipa af öllum miðum 63 milljarðar króna samanborið við 62,9 milljarða króna á sama tímabili 2003. Aflaverðmæti hefur því aukist um 0,3% á milli ára eða um 184 milljónir króna, á verðlagi hvors árs fyrir sig. Þetta kemur fram í frétt frá Hagstofu Íslands um verðmæti sjávarafla fyrsti 11 mánuði ársins 2004.

Meginniðurstaða nefndar sem sjávarútvegsráðherra setti á fót til að gera úttekt á starfsumhverfi sjávarútvegsins er sú að áfram eigi að byggja á því skoðunarstofukerfi sem nú er við lýði. Það eigi hins vegar að þróa það frekar og bæta og skoða hvernig skoðunarstofur geti tekið við auknum verkefnum við framkvæmd eftirlits. Bent er á að auk frekara samstarfs, samvinnu og trausts á milli Fiskistofu og skoðunarstofa þurfi þessir aðilar að skerpa á hlutverki sínu, framkvæmd og ábyrgð við eftirlitið. Þetta kemur fram í áfangaskýrslu nefndarinnar.

Sjávarútvegsráðuneytið hefur synjað ósk LÍÚ, útvegsmannafélags Snæfellsness, Akraness, Reykjavíkur, Suðurnesja, Þorlákshafnar, Hornafjarðar og Útvegsbændafélags Vestmannaeyja um að breyta tímasetningu á friðun hrygningarþorsks á vetrarvertíðinni. Þannig háttar til að í ár eru páskar óvenju snemma og er skírdagur 24. mars. Páskarnir hafa yfirleitt fallið inn í hrygningarstoppið en svo er ekki nú, þar sem hrygningarfriðunin hefst 1. apríl. Hætt er við að synjun ráðuneytisins verði til þess að útgerðir neta- og dragnótabáta veiði aflamark sitt í þorski fyrr en verið hefði sem síðan leiðir til þess að færri fiskar hrygna en ella. Enda eru dauðir þorskar ekki þekktir fyrir að hrygna.

Nýleg þjóðhagsspá fjármálaráðuneytisins um afkomu sjávarútvegsins vekur upp ýmsar spurningar. Ráðuneytið miðar í útreikningum sínum við að gengisvísitalan verði 119,4 stig á þessu ári, þrátt fyrir að vísitalan hafi verið 111 stig þegar spáin var gerð. Í þessu felst að ráðuneytið gerir ráð fyrir verulegri veikingu krónunnar á árinu.

Fjármálaráðuneytið sendi nýverið frá sér endurskoðaða þjóðhagsspá og hefur mat ráðuneytisins á afkomuhorfum í sjávarútvegi vakið athygli fjölmiðla. Hafa þeir greint frá því að vergur hagnaður sjávarútvegsins á þessu ári sem hlutfall af tekjum (EBITDA) sé áætlaður 16,9%. Þessi spá ráðuneytisins er undarleg enda gerir það ráð fyrir mun lægra gengi krónunnar á þessu ári en nú er. Fullyrðir ráðuneytið að greinin geti vel við þennan hagnað unað, í sögulegu ljósi séð, en sú fullyrðing ráðuneytisins er röng eins og fram kemur hér á eftir.

Þorskur lækkar um 5% og karfi hækkar um 8%.

Útgefið aflamark úthafsrækju fyrir yfirstandandi fiskveiðiár er 20 þúsund tonn, en úthafsrækjustofninn náði sögulegu lágmarki árið 2004. Minnkaði úthafsrækjuaflinn úr 22 þúsund tonnum árið 2003 í tæp 16 þúsund tonn árið 2004. Rækjustofninn er nú metinn minni en hann var árin 2001 til 2003 og fer minnkandi, samkvæmt nýlegri úttekt Hafrannsóknastofnunarinnar á ástandi úthafsrækjustofnsins. Vísitala í stofnmælingu úthafsrækju 2004 lækkaði frá árinu 2003 samfara auknum göngum þorsks fyrir norðan og austan land. Rétt er að rifja það upp, að breytingar sem gerðar voru á  fyrirkomulagi stofnmælingar úthafsrækju á síðasta ári auka á óvissu í stofnmati og ráðgjöf . Bæði var að rannsóknadögum var fækkað og eins að stofnmæling fór fram mánuði fyrr en áður. Er því mælingin nú ekki fyllilega sambærileg við mælingar fyrri ára.

Í tilefni af 100 ára sögu togaraútgerðar á Íslandi mun sjávarútvegsráðuneytið efna til ráðstefnu um framtíð sjávarútvegsins þann 4. mars nk. á Hótel Nordica. Nú eru 100 ár frá því Coot, fyrsti togarinn í eigu Íslendinga, kom til hafnar í Hafnarfirði. Jafnframt hafa sjávarútvegsráðuneytið og menntamálaráðuneytið ákveðið að efna til samkeppni meðal grunnskóla landsins um verkefni sem ber yfirskriftina Sjávarútvegur í fortíð, nútíð og framtíð. Fer hún fram á þessu skólaári og er tilefnið 100 ára saga togaraútgerðar í landinu.

Tollar á mikilvægustu útflutningsvörum Íslendinga til Rússlands lækka verulega eftir að samkomulag hefur náðst í beinum viðræðum við Rússa vegna fyrirhugaðrar aðildar þeirra að Alþjóðaviðskiptastofnuninni, WTO.

Sjávarútvegsráðuneyið hefur gefið út reglugerð um bann við veiðum vegna hrygningar þorsks og skarkola, en reglurnar eru óbreyttar frá síðasta ári.

Loðnukvóti íslensku skipanna verður aukinn um 556 þúsund tonn ef sjávarútvegsráðherra fer að tillögu Hafrannsóknastofnunarinnar um aukningu kvótans, en rannsóknaskipið Árni Friðriksson hefur lokið mælingu á loðnugöngunni norður og austur af landinu.

Samgönguráðherra mun á næstunni gefa út reglugerð sem miðar að því að draga úr hættu á að fiskiskip sökkvi vegna óvænts leka, en sjóslysum af þeim ástæðum hefur farið fjölgandi undanfarin misseri. Reglugerðin er í samræmi við tillögur Landssambands íslenskra útvegsmanna, sem lagðar voru fram í Siglingaráði 15. október sl.

Félagar í Sjómannasambandi Íslands, Farmanna- og fiskimannasambandi Íslands Alþýðusambandi Austurlands og Alþýðusambandi Vestfjarða samþykktu kjarasamning þessara aðila við Landssamband íslenskra útvegsmanna sem undirritaður var þann 30. október sl. Samningurinn var samþykktur með 57,6% atkvæða.

Loðnuveiðarnar eru hafnar og er Börkur NK á landleið með 1.200 tonn sem fara til frystingar í Fiskiðjuveri Síldarvinnslunnar hf. í Neskaupstað. Þá er Ásgrímur Halldórsson SF á leið til Hornafjarðar með 700 tonn af loðnu.